Ganting salapi ang gipanghatag sa Kagamhanan sa Dakbayan sa top 5 best-performing barangays sa kampanya sa pagbakuna batok sa Covid-19 pinaagi sa Bakuna Awards uban sa pag-abag sa Ramon Aboitiz Foundation Inc. (RAFI).
Ang fully vaccinated individuals gihatagan usab og cash prizes pinaagi sa raffle draw.
Ang tema: “Barangay nga Kugihan Muawhag sa Pagpabakuna Naay Ayuda,” diin ang seremonyas gipahigayon sa session hall sa Mandaue City Hall niadtong Biyernes, May 20, 2022.
Ang top five barangays kabahin sa pito ka mga priority local government units sa Metro Cebu ug nakaabot sa target vaccination rate nga 70 percent subay sa talaan sa Department of Health (DOH) sa Disyembre 2021, nakadawat og incentive awards.
Ganti nga P50,000 sa unang dapit; P45,000 sa ikaduha; P40,000 sa ikatulo; P35, 000 sa ikaupat; ug P30,000 sa ikalima.
Ang Barangay Centro maoy nag-una ug gisundan sa Barangay Basak, Bakilid, Looc ug Ibabao.
Samtang, lima ka mga Mandauehanon nga nakakompleto sa ilang first ug second doses ang gipanghatagan og premyo pinaagi sa raffle draw.
Ang first prize winner mao si Randy Manlujao sa Barangay Canduman nga nibulsa sa P50,000; Kent Amasa Rosaroso sa barangay Tipolo, P40,000; Marc Prince Noval Angeles sa Barangay Paknaan, P35,000; Zenaida Sucalit sa Barangay Looc, P25,000, ug Geraldez Canizares Teraleo sa Barangay Cambaro, P15,000.
Ang individual award winners gitambagan sa pagpaabot sa tawag o text gikan sa usa ka RAFI representative alang sa instructions kon unsaon sa pagkuha ang premyo nga salapi.
Ang complete list of winners gi-post sa Mandaue City Public Information Facebook page uban sa dugang impormasyon. / HIC, TPT