Laing minilyon nga balor sa illegal nga drugas ang nasakmit sa kapulisan sa lalawigan sa Bohol atol sa gilusad nga buy-bust sa Sabado sa buntag, Mayo 21, 2022.
Ang Tagbilaran City Police Station ubos sa Bohol Police Provincial Office (BPPO) nilusad sa ilang anti-illegal drug operation sa ala 1:50 sa kaadlawon sa Purok 3, dalan Budlong, Barangay San Isidro, Tagbilaran, nga niresulta sa pagkasikop sa drug suspect nga si Jaime Aguaviva Gumba, 31, taga Purok 1, Taloto, Tagbilaran.
Nakuha gikan sa suspek ang 200 gramos nga gituohang shabu nga adunay standard drug price nga P1,360,000 lakip na ang buy-bust money ug mga gamit sa pag suyop sa illegal nga drugas.
Si Gumba gitumbok nga nalakip sa listahan sa mga high value Individual (HIV) sa tibuok lalawigan sa Bohol tungod sa dinagko niini nga supply sa gidiling drugas nga mabaligya matag semana.
Lakip sa nakuha sa kapulisan ang cellular phone sa suspek nga gitakdang ipaubos sa forensic examination kon kinsa ang mga gaway niini sa Bohol ug ang Yamaha Mio nga motorsiklo niini.
Tungod niini, gidayeg ni Police Brigadier General Roque Eduardo Vega, hepe sa Police Regional Office (PRO) 7, ang kapulisan sa Tagbilaran sa ilang malampuson nga anti-illegal drug operation.
Mando niya sa tanan niyang mga police personnel sa Central Visayas nga dili mohunong sa ilang gubat batok sa illegal nga drugas hangtod nga mawagtang kini.
Sanglit usa ang drugas sa hinungdan sa krimen nga mahitabo sa usa ka lokalidad nga angay nga hingusgan pa sa tanang police offices.
Duna pay mga HVI nga target sa sunod nga operations dili lang sa Bohol, lakip na sa dakbayan sa Sugbo nga usa sa hagbonganan sa illegal nga drugas gikan sa nagkainlaing lugar sa Pilipinas.