Duha ka mga notadong kawatan ang nangaposasan atol sa usa ka anti-illegal drug operation sa mga operatiba sa Abellana Police Station sa Cebu City Police Office (CCPO), ala 1:50 sa kaadlawon kagahapon, Mayo 21, sa dalan Juana Osmeńa, Barangay Camputhaw, dakbayan sa Sugbo.
Ang grupo ni Police Captain Jefferson Sinfuego, deputy station commander sa Abellana Police Sation, maoy nihimo sa pagpangronda nga niresulta sa pagkasikop sa duha ka mga suspek.
Ang mga nadakpan nailhan nga sila si Junard Marzon, alyas Pepe, 18, ug ang iyang higala nga si Jerome Flores Foster, alyas Jerome, 18, pulos lumolupyo sa nahisgutang barangay.
Atol sa operation sa kapulisan batok sa duha ka mga suspek, nakuhaan usab sila og ubay-ubay nga mga pakete sa gituohang shabu.
Samtang dihang gipangkapkapan sila sa nangrondang kapulisan, nakurat sila sa mga nasakmit nga grabe kadaghang indentification cards (IDS) ug mga ATM card nga gituohan nga kini gipanag-iya sa mga nabiktima sa duha ka mga dinakpan, kinsa pulos gibalhog na sa bilanggoan.