Mas mapalambo ang turismo sa isla sa Malapascua sakop sa lungsod sa Daanbantayan sa amihanan sa Sugbo nunot sa gitinguha sa Kagamhanan sa Probinsya nga sugdan ning tuiga ang dugay nang gilaraw nga circumferential road.
Si Cebu Governor Gwendolyn Garcia nagkanayon nga nitugot na ang land owners nga mo-donate sa bahin sa ilang properties aron makapadayon ang kagamhanan sa plano niini nga circumferential road.
Gawas nga makahatag kini og kasayon sa mga residente sa pagbiyahe, mas molambo usab ang turismo sa lalawigan sanglit sayon na lang sa mga turista ang pag bisita sa tourist destination sa maong lugar.
“It took quite some time because we needed to get the road right of way, but finally we will be starting on the Malapascua Island Circumferential road kay kon mosakay ka didto og habal2, kapila na ko ana usahay maghiyak hiyak imong tiyan. Naglisod man gud ta og kuha og road right of way,” matod ni Garcia.
Si Limuel Daño, barangay kapitan sa Malapascua, nagkanayon nga nipirma na ang dili mominus 20 ka homeowners sa isla sa mga dokumento nga gikinahanglan aron mapadayon ang proyekto.
Sa kasamtangan wala pa masayri pila ang kantidad nga magasto sa maong proyekto.
Apan si Daanbantayan Mayor Sun Shimura nanghinaot nga madayon na ang maong proyekto karong tuiga hilabina nga usa kini sa nakita nila nga pamaagi aron nga mas molambo pa ang turismo sa Malapascua.
“Makatuyok ta sa tibuok isla by foot nga dili na hago ug hasol. The plan of the governor is really for tourism gyud,” matud ni Shimura pinaagi sa circumferential road.
Sa panahon ni kanhi gobernador ug karon incumbent Vice-Governor Hilario Davide III, aduna nay plano pagsemento sa lima ka kilometro nga dalan sa Barangay Loon sa Malapascua island apan wala kini mapadayon.