Human sa 12 anyos nga proseso sa pagka santo, si anhing Cebuano archbishop Teofilo ‘Lolong’ Camomot gideklarar isip ‘Venerable’ ni Pope Francis niadtong Sabado, Mayo 21, 2022.
Ang kadagkoan sa Archdiocese of Cebu nikompirmar sa taho human ang Papa niluwat og usa ka decree nga nag-ila sa heroic virtues ni anhing Camomot atol sa tigom sa mga opisiyal sa Congregation for the Causes of Saints ubos sa pagpangulo ni Archbishop Marcello Cardinal Semeraro, sa samang adlaw.
Si Camomot karon ‘Venerable’ na ug nagkinahanglan na lang og duha ka mga milagro, ang usa aron mahimo siya nga ‘beatified’ ug ang laing usa mao ang pagdeklarar niya nga hingpit nga usa sa mga santo sa Simbahang Romano Katoliko sa tibuok kalibotan.
Si Msgr. Joseph Tan, tigpamaba sa Archdiocese of Cebu, niasoy sa SunStar Cebu nga nalipay sila kaayo sa pahibalo sa Papa.
Matod ni Tan, nagpaabot siya sa pamahayag gikan kang Cebu Archbishop Jose Palma bahin sa plano niini nunot sa maong kalamboan.
Si Camomot natawo sa Barangay Cogon sa lungsod sa Carcar niadtong Marso 3, 1914. Naordinahan siya sa pagka pari sa Disyembre 14, 1941, o pipila ka adlaw sa pagbuto sa 2nd World War.
Gawas sa iyang pagkayano, personal holiness ug apostolic works, si Camomot dunay espirituwal nga gasa sama sa pagpanambal, bilocation (dungan nga makita sa managlahing dapit) ug levitation (moisa bisan wa gituboy).
Si anhing Cebu Archbishop Ricardo Cardinal Vidal usa sa nisaksi nga si Camomot dunay abilidad sa pagpakita sa managlahing dapit sa samang higayon.
Nadestino sa nagkalainlaing parokya sa Sugbo ug ubang dapit sa nasod, si Camomot nakasirbisyo nga Coadjutor Archbishop Emeritus of Cagayan de Oro.
Siya maoy founder sa Daughters of Saint Theresa (DST) nga nagbase sa Barangay Valladolid, Carcar City sa wala pa siya namatay sa aksidente sa sakyanan sa Magtalisay, San Fernando niadtong Septiyembre 27, 1988.