Gipangulohan ni Eumir Marcial ang pagpanghakot og gold medals sa mga boksidor sa Pilipinas kagahapon, Mayo 22, 2022 sa 31st Southeast Asian Games sa Hanoi, Vietnam.
Si Marcial, kinsa Tokyo Olympic bronze medalist, milangkat og gold medal sa middleweight division pinaagi sa makapaukyab nga 1st round stoppage batok kang Timorese slugger Delio Anzaqeci.
Kanunay nga gigamit ni Marcial ang iyang jabs aron makakuha og saktong higayon sa pagbuhi sa iyang gikahadlukang right hook.
Ang right hook ni Marcial maoy hinungdan nga kaduha natawagan og standing 8-count sa referee si Anzaqeci.
Human sa ikaduhang standing 8-count, nakadesisyon ang referee nga undangon na ang away.
Sa kinatibuk-an, kini maoy ikaupat nga gold medal ni Marcial sa matag duha ka mga tuig nga kompetisyon.
Sa sayo pa, nakakuha sab og gold medal ang laing Pinoy nga mga boksidor nga sila si Rogen Ladon ug Ian Clark Bautista.