Sa labing unang higayon sulod sa kapin sa tulo ka mga dekada, wala makalangkat og gold medal ang Pilipinas sa men’s basketball sa Southeast Asian Games.
Kini human gipakaging sa Indonesia ang Gilas Pilipinas, 85-81, sa inilogay og gold medal nga kombati kagahapon, Mayo 22, 2022, sa 31st edition sa matag duha ka mga tuig nga kompetisyon nga gipahigayon sa Hanoi, Vietnam.
Katapusang wala nakakuha og gold medal ang Pilipinas sa kompetisyon niadto pang 1979 diin ang Malaysia maoy naghari.
Pagsugod pa lang sa duwa, kanunay na naggukod ang Gilas.
Hinuon sa pagpangulo sa Sugboanong higante nga si JuneMar Fajardo, nakagukod ang Gilas ug ningposte’g 60-54 nga labaw sa hinapos nga bahin sa 3rd quarter.
Apan human niini, gihuman sa Indonesia ang 3rd quarter pinaagi sa pagpaboto og tulo ka sunodsunod nga three-point bombs nga naghatag kanila og 63-60 nga labaw pagsugod sa 4th quarter.
Grabe ka sikit ang kombati sa tibuok 4th quarter ug mianinag lang ang kadaugan alang sa Indonesia dihang nakamugna sila og 83-79 nga labaw sa nahabiling unom ka mga segundos.
Naghatag og dakong problema sa Gilas mao ang tulo ka naturalized players sa Indoensia nga sila si Marques Bolden, Derrick Michael Xzavierro, ug Damar Abraham Gratiwa.
Ang Gilas gipangulohan ni Matthew Wright pinaagi sa iyang 23 puntos, nidugang og 20 puntos si Fajardo samtang niamot og 17 puntos si Thirdy Ravena.