Dugang duha ka sanga sa Land Transportation Office (LTO) moabli sa lungsod sa Liloan sa aminahan ug Alcoy sa habagatan sa lalawigan sa Sugbo.
Si LTO 7 Director Victor Caindec nagkanayon nga nagpaabot na lang siya sa pormal nga pagpahibalo gikan sa Department of Transportation (DOTr) ug LTO central office kon kanus-a kini ablihan.
Matod ni Caindec sa iyang pamahayag niadtong Sabado, Mayo 21, 2022, naghinamhinam siya tungod sa pagpaabot niini nga mahitabo sulod na sa usa ka tuig ug tunga uban sa pag-abag ni Fifth District Rep. Vincent Franco “Duke” Frasco ug Second District Rep. Wilfredo “Willy” Caminero, kinsa sponsors sa naasoy nga balaudnon.
“Our esteemed lawmakers to make sure that they are able to work together in getting the bill to be passed and signed by the President,” matod ni Caindec.
Siya nagkanayon nga kini moabag, lakip sa extension offices, human ang tanang LTO offices kanunay puno sa mga kliyente nga mokuha sa serbisyo sa ahensiya.
Ang district offices dunay ilang kaugalingong budget ug plantilla, diin ang resources dili mabahin sama sa extension offices.
Gawas sa Cebu, ang lalawigan sa Bohol ug Dumaguete City dunay susamang lakang sa paghimo og licensing offices ug aprobado na usab kini.
“We hope to put to rest the concerns of people that they are being told by their dealers nga moabot og six months. So May 11 and earlier have already been completed by LTO,” dason niya, uban sa basehanan nga kini responsibilidad sa dealers sa pag-cover sa registration sa sakyanan.
Matod ni Caindec, moluwat sila og mas detalye nga bahin sa kalamboan ning semanaha ug mopadala og komunikasyon sa mga dealer sa rehiyon.