Moabot na ngadto sa 1,215 ka mga barangay sa Central Visayas (ang nadeklarar na sa Regional Oversight Committee on Barangay Drug Clearing Program (ROCBDC) nga drug-cleared barangay sukad kini gisugdan niadtong 2018 human laing 48 ang bag-o lang gideklarar.
Ang ROCBDC naglangkob kini sa Department of the Interior and Local Government DILG, Philippine National Police, Department of Health (DOH) ug ang Philippine Drug Enforcement Agency nga maoy chairman.
Sila ang mosusi sa mga dokumento nga iduso sa Barangay o Municipal Anti-Drug Abuse Council alang sa pagdeklarar sa usa ka dapit nga drug-cleared.
Ang drug-cleared nagpasabot nga unang dunay presensiya sa negosyo sa gidiling druga sa dapit apan nasumpo sa subsob nga operasyon sa awtoridad.
Samtang ang drug-free, mao kadtong barangay wala maimpluwensiya sa negosyo o pag-abuso sa gidiling druga.
Sukad usab gisugdan ang programa, nakadeklarar na ang ROCBDC og 116 ka mga barangay nga drug free nga nagpasabot nga wala na kini kalihukan sa illegal nga drugas.
Sa 48 ka mga barangay nga drug cleared na, ang labing daghan naa sa lalawigan sa Bohol nga adunay 37 nga gisundan sa probinsya sa Sugbo nga adunay 6, upat sa Negros Oriental samtang usa sa dakbayan sa Mandaue nga giila nga urban city, kini mao ang barangay Basak.
Samtang adunay tulo ka munisipyo sa probinsya sa Sugbo ang nadugang sa duha nga gideklarar usab nga drug-cleared. Kini mao ang Madridejos, isla sa Bantayan; Santander, amihanang dapit sa lalawigan; ug San Francisco, isla sa Camotes.
Matod ni Leia Alcantara, information officer sa Philippine Drug Enforcement Agency (PDEA) 7, ang tulo ka lungsod nga gideklarar nga drug-cleared ang tanan niini nga barangay drug cleared usab.
“Yes, Sir, dapat 100% sa ilang barangays drug-cleared/drug-free na and dapat na validated ni nga barangays, meaning ni-undergo sila sa process para ma-check if na-maintain nila ilang status,” matod ni Alcantara.
Kinahanglan nga adunay kasamtangang ordinansa ang maong lungsod o ang LGU sa anti-illegal drug programs sama sa drug-free workplace program ug pag dili sa pagpamaligya sa solvents ug susama nga substance sa mga menor de edad.
Dugang gipasabot sa PDEA-7 nga ang mga bag-ong barangay nga gideklarar nga drug-cleared nakahatag kinig igong gibug-aton nga angayan sila sa maong status tungod kay ang tanang drug personality sa ilang dapit ang ilang na account.
Napaubos usab kini sa Community-Based Rehabilitation Program CBRP sa barangay ug sub-sob nga monitoring nga ang maong mga personality wala na mobalik sa ilang naandan nga bisyo.
Wala kini magpasabot nga dili na mamahimong target sa anti-illegal drug operation sa kapulisan ug sa PDEA ang maong barangay kon adunay ma-monitor nga namaligya sa illegal nga drugas.
Ang hagit niini ngadto sa barangay officials mao ang pag-monitor sa mga drug personality nga gipaubos sa CBRP nga dili na mobalik sa ilang naandan nga bisyo.
Matod ni Alcantara nga aduna pay mga barangay ang gipaubos sa deliberation sa ROCBDC nga sa mosunod nga mga semana ila usab kini nga ma deklarar.