Sa mga sumosunod sa Simbahang Romano Katoliko sa Sugbo ug mga Bisaya, dakong piyesta ang pagdeklarar ni Pope Francis sa Vatican niadtong Sabado, Mayo 21, isip ‘Venerable’ si anhing Archbishop Teofilo ‘Lolong’ Camomot nga duol na sa ang-ang sa hataas nga proseso sa iyang pagka santo.
Kini ang hinungdan ang Archdiocese of Cebu nangita og duha ka mga milagro nga malambigit sa kanhi Arsobispo aron hingpit nga ideklarar nga santo.
Matod ni Fr. Mhar Vincent Balili, parish priest sa Mary Help of Christians Parish sa Barangay Buhisan, dakbayan sa Sugbo ug vice postulator alang sa kawsa ni Camomot, niingon nga daghan ang ilang nakolekta nga testimonyas nga naayo pinaagi sa pagtabang ni Camomot, apan walay usa niini nga nakapasar isip lubas nga milagro.
Ang duha ka mga milagro gikinahanglan alang sa iyang beatification ug ang laing usa nga mas bug-at mao ang alang sa pagka santo. Dili bastabasta human ang milagro hashasan o ipaubos sa makuti nga imbestigasyon dili lang sa mga opisyal sa simbahan apan grupo sa mga batid nga doktor kon ang nasinati nga milagro mugna sa balaang espiritu.
Gipasabot ni Balili nga ang ‘milagro’ kinahanglan nga makapasar sa makuting paghashas ug ang tawo nga mosaksi naayo sa sakit nga nag-ung-ong sa kamatayon nga dili mapasabot sa siyensiya o mga doktor nga nagsusi sa kaso, kini isipon nga tiunay nga milagro.
Kon masanto si Camomot, siya maoy ikatulong Pinoy nga santo. Una mao si San Lorenzo Ruiz ug ikaduha mao ang laing Bisaya nga si San Pedro Calungsod. Ang unang duha pulos tungod sa kawsa sa pagka martir sa pagbarog sa pagtuo. Ang kawsa ni Camomot human gibasi sa ‘pagka balaan’ dihang buhi pa.
Sa mga Katoliko o bisan sa ubang relihiyon, ang kawsa sa pagka santo para sa tanan. Usa kini sa mahimong inspirasyon ngadto sa pagpakabuhing Diyosnon.