Human gideklarar si anhing Archbishop Teofilo ‘Lolong’ Camomot nga “Venerable” ni Pope Francis, ang kadagkoan sa Archdiocese of Cebu nangita og duha ka mga milagro nga malambigit sa kanhi Arsobispo aron hingpit nga ideklarar nga santo human sa ‘beatification.’
Si Fr. Mhar Vincent Balili, parish priest sa Mary Help of Christians Parish sa Barangay Buhisan, Cebu City ug vice postulator for Camomot’s cause, niasoy sa SunStar Cebu nga bisan sa kadaghan sa ilang nakolekta nga testimonyas nga naayo tungod sa pagtabang ni Camomot, walay usa niini nga nakapasar isip genuine miracle sa pagduso sa iyang pagka santo.
Matod ni Balili, ang duha ka milagro gikinahanglan alang sa iyang beatification ug ang laing usa nga mas bug-at mao ang alang sa pagka santo.
Apan ang mga milagro o ‘pabor’ nga nadawat sa mga tawo sa pagtabang kang Camomot kinahanglan nga hashasan o ipaubos sa makuti nga imbestigasyon dili lang sa mga opisyal sa simbahan apan grupo sa mga batid nga doktor kon ang nasinati nga milagro mugna sa balaang espiritu.
“While the diocesan process has already been concluded, our work in promoting Camomot’s cause is far from over,” matod ni Balili.
Gipasabot ni Balili nga ang ‘milagro’ kinahanglan nga makapasar sa makuting paghashas ug ang tawo nga mosaksi, naayo sa sakit nga nag-ung-ong sa kamatayon nga dili masabot sa siyensiya labi na sa mga doktor nga nagsusi sa kaso.
Samtang nangita sila sa tiunay nga milagro, si Balili niawhag sa mga sumosunod sa simbahan sa pag-abag sa kawsa sa pagka santo ni Camomot.
Sa pagkakaron, si Balili nagkanayon nga ang Archdiocese gikatakda nga mohimo og Thanksgiving Mass sa pagsaulog sa status nga “Venerable” ni Camomot.
Kon masanto si Camomot, siya maoy ikatulong Pinoy nga santo.
Una mao si San Lorenzo Ruiz ug ikaduha mao ang laing Bisaya nga si San Pedro Calungsod.
Ang unang duha pulos tungod sa kawsa sa ilang pagka martir sa pagbarog sa pagtuo.
Lahi ang kawsa ni Camomot human gibase sa iyang ‘pagka balaan’ dihang buhi pa isip alagad sa simbahan.