Tutor sa usa ka 10 anyos nga batang babaye gidakop ug gipriso sa Sawang Calero Police Station sa Cebu City Police Office (CCPO) human gireklamo sa ginikanan nga gihinol ang ilang anak samtang nagtubag sa module sa tunghaan.

Si Police Senior Master Sergeant Rene Remedios, desk officer sa Sawang Calero Police Station, nikompirmar nga ang 40 anyos nga suspek nga tutor napriso sa ilang selda apan wala na mohatag og dugang detalye.

Samtang, si Police Major Irañeo Regidor, hepe sa Sawang Calero Police Station, nagkanayon nga ang kaso gidumala na sa Women’s Children and Protection Desk (WCPD) sa presinto.

Subay sa testimoniya sa bata sa WCPD, gisugdan kini sa paghilabot sa tutor niadtong 8 anyos pa kini tungod sa pagtudlo og module human gisuspenso ang face-to-face nga klase nunot sa pandemiya sa Covid-19.

“Ang kinatawo sa suspek ipasulod sa kinatawo sa bata..” matod ni Regidor, base sa asoy sa bata.

Dugang ni Regidor sa pamahayag sa bata ngadto na sa WCPD nga kini sama sa naanad na sa gibuhat sa tutor ngadto niya tungod sa kalinghod pa sa panghunahuna niini.

Nasayran nga dunay paryente sa ginikanan sa bata nga diha nagpuyo sa ilang dapit ang unang nakakita sa gibuhat sa suspek apan wala lang sila makakuha og ebidensiya.

“Hangtud nga na-video-han daw ni kadtong gibuhat sa tutor ug maoy ilang gipaabot sa ginikanan sa bata,” dugang ni Regidor.

Tungod sa maong hitabo, ang ginikanan sa bata naniid na sa lihok sa tutor ug nahibulong kon nganong trangkahan o i-lock ang kwarto sa balay sa biktima samtang mopahigayon sa pagtuon sa module sa bata.

Hangtud na nga nianang hapon sa Sabado, Mayo 21, 2022, gipanid-an na sa mga ginikanan ang maong tutor ug mao lang gihapon ang gibuhat nga i-lock ang kuwarto.

Ang pultahan ilang gikalit sa pag-abli sa ilang yawe ug nasakpan ang suspek sa iyang gibuhat sa bata.

Ang 40 anyos (ngan gipugngan) kasamtangan na karon nagtingkagol sa Sawang Calero Police Station samtang mag-atubang kini og kasong pagpanglugos.