Usa ka mananagat patay human naigo sa kilat sa kadagatan sa Barangay Zaragoza, lungsod sa Badian sa habagatan sa lalawigan sa Sugbo ug nakaplagan kini kagahapon sa buntag, Mayo 22, 2022.

Si Police Lieutenant Etelberto Timagos niila sa biktima nga si Ronald Coronel Mayormita, 33, mananagat ug taga Barangay Banhigan, Badian.

Usa ka concerned citizen nanawag sa kapulisan sa alas 5:35 sa buntag kagahapon bahin sa patay sa ibabaw sa iyang sakayan ug giadto kini dayon sa kapulisan.

Ang biktima gidali pagdala sa Badian District Hospital apan gideklarar nga dead-on-arrival (DOA) sa alas 7:20 sa buntag kagahapon.

Sumala sa attending physician, Dr. Noel C. Filipinas, ang biktima namatay tungod sa pag-igo sa kilat. (GDC, Kapulisan sa Badian)