MGA ARMAS nga gitaguan sa New People's Army (NPA) ang napalgan sa mga awtoridad alas 10 a.m. niadtong Dominggo, Mayo 22, 2022 sa Kidapawan City.
Kini pinaagi sa pag-abag sa misurender nga sakop sa kalihukan nga si Mayunie Man-Inday Say-ad ilawom sa Guerilla Front 53.
Misurender si Say-ad sa puwersa sa 72nd Infantry Battalion (IB), Philippine Army nga gipangulohan ni Lieutenant Colonel Jose Regonay sa Barangay Greenfield, Arakan, Cotabato Province.
Sa dihang gisukit-sukit sa mga sundalo, gitudlo ni Say-ad ang ilang mga gitagoan nga mga armas.
Tungod niini, milusad gilayon og operasyon ang mga sundalo kon diin narekober niini ang nagkadaiyang mga armas didto sa utlanan sa Arakan ug Bukidnon.
Gilangkuban kini sa duha ka M16 Armalite rifles, duha ka M4 Carbine, usa ka M635 rifle, usa ka M14 rifle, mga bala uban ang mga magazines.
Nanawagan ang 72nd IB sa mga NPA nga nagtago-tago pa sa kabukiran nga mobalik na sa sabakan sa balaod ug manginabuhing malinawon.