SELOS sa posisyon ang gilantaw nga motibo sa pagpamusil sa barangay kapitan alas 7:00 sa gabii niadtong Mayo 22, 2022 sa Midsayap, Cotabato Province sa Kidapawan City.
Giila ang biktima nga si Nestor Rabara, 64 anyos, minyo, molupyo sa Barangay Lower Glad sa Midsayap.
Gibutyag ni Midsayap Chief of Police Lieutenant Colonel Rolly Oranza nga nanihapon lang biktima sulod sa iyang balay sa Purok 2 sa nahisgutang barangay.
Apan kalit lang dunay armado nga milili sa bintana ug gipusil ang biktima gamit ang kalibre .45 nga pistola.
Daling gisapupo ang biktima sa iyang pamilya ug gihatud ngadto sa balay tambalanan samtang ang suspek miiktad sab dayon sakay sa naghuwat nga motorsiklo sa daplin sa kalsada nga gimaneho sa laing kauban.
Giingong naa sa talandugon nga kahimtang ang kapitan human maigo sa paa, likod ug lubot.
Nasayran nga si Rabara igsuon ni Midsayap Vice Mayor ug Cotabato Board Member-elect Manuel Rabara.
Daghan ang nagduda nga posibleng dunay kalabutan sa trabaho ni Rabara ang motibo sa pagpamusil kaniya ilabi na nga nagsingabot ang barangay election sa Disyembre 5, 2022.