ANAA sa talandugon nga kahimtang ang angkas samtang patay ang duha ka mga drayber sa 2 ka motorsiklo sa dihang nagsampok alas 4 sa hapon niadtong Mayo 22, 2022 didto sa Purok Banikanhon, Barangay Poblacion Dos sa Bansalan, Davao del Sur.
Giila ang mga biktima nga namatay nga sila James Torregosa Laroa, 19-anyos, molupyo sa Purok Maligaya, Sampaguita, Poblacion Uno ug si Zosimo Epogon Velos, 47-anyos, nagpuyo sa Purok Rizal, Lower Mabunga samtang ang naangol nga angkas mao si Kimboy Paban Egos, 23-anyos, taga Malita, Davao Occidental.
Suma sa report sa Bansalan Municipal Police Station nga nagkasampok ang duha ka motorsiklo hinungdan nga maayong pagkaguba sa duha ka motorsiklo ug nangabungkag ang kinahon nga kamates nga karga sa usa ka motor.
Gidali og dala ngadto sa Mabama Hospital sa Bansalan ang mga nahisgutan, apan ang duha ka drayber patay na nga nahidangat sa ospital samtang ang angkas kritikal.
Gipahiluna na sa ilang tagsa-tagsa ka mga pamilya ang mga nakabsan sa kinabuhi.