GISUPORTAHAN ni outgoing Davao City Mayor ug presumptive Vice President Sara Duterte-Carpio ang sugyot nga pagsibog na sab sa barangay and Sangguniang Kabataan (SK) elections, nga gikatakda sa Disyembre 2022.

"Well I do think na mas maayo kung i-postpone nato ang atong barangay elections because we can save money dinha sa pagpahigayon og elections, which the new administration can use sa mga mas importante nga butang sa pagkakaron nga epekto tungod sa economic downturn that we see all around the world," pahayag ni Duterte-Carpio sa paghinabi kaniya sa 87.5 FM Davao City Disaster Radio kagahapon, Lunes, Mayo 23, 2022.

Apan ang mayor nagklaro nga ang pag-oktaba sa barangay elections nanginahanglan pa gihapon og balaudnon gikan sa Kongreso.

Hinuon giklaro niya nga way dautan kon magpahigayon og national and local elections ug barangay and SK elections sa samang tuig.

Niadtong Nobyembre 2021, usa ka balaudnon ang giduso sa House of Representatives nga nagtinguha sa pagsibog sa Disyembre 2022 nga barangay ug SK eleksiyon ngadto sa Mayo 2024.

Ilawom sa Republic Act 9340, ang barangay and SK elections sa Pilipinas ipahigayon matag tulo ka tuig apan kini nadelatar kanunay, ug mga opisyal sa barangay naglugway sa ilang katungdanan ngadto sa lima na ka tuig.

Sukad 2018, gisibog na og makatulo ka higayon ang barangay elections. Ang eleksiyon unta sa Disyembre 2022 mahitabo unta kini niadto pang Mayo 2020.