HOMAN sa proklamasyon sa Commission on Elections (Comelec) sa mga napili nga opisyales sa probinsya sa Sugbo, sa kalungsoran ug mga dakbayan, angayan na nga mahibalik ang mga maayong relasyon sa mga pulitiko ug sa ilang mga dumadapig bisan og di ikalimod nga dunay mga napildi nga mora og wala pa mahuwasi sa ilang kapildihan ug duna pay pagduda sa resulta sa miagi nga general elections.
Ang duha ka dagkong opisyales sa Kapitolyo, si Gob. Gwen Garcia ug Bise Gob. Junjun Davide, nagpakita sa ilang maayong kabubut-on bisan dili sila kauban sa partido sa miaging piliay. Matud pa sa taho sa SunStar Cebu, gibisita ni Bise Gobernador Davide si Gobernador Gwen sa iyang opisina aron pagpaphalipay sa iyang kadaugan sa miaging piliay. Ug, girisibi usab ni Gobernador Gwen si Bise Gobernador Davide.
Mao ni usa ka sulondon nga hiyas sa mga maayong pulitiko ug opisyales sa kagamhanan nga angayan sundogon sa uban.
Si Gobernador Gwen midagan ubos sa iyang One Cebu Party ug midaug siya sa 1,478,436 ka botos batok ni kanhi Tourism secretary Ace Durano nga nakakuha lang og 341,455 ka botos, samtang si Bise Gobernador Davide midagan ubos sa Liberal Party ug nakakuha og 788,081 ka botos batok sa iyang kaatbang nga si Dr. Tess Heyrosa nga nakakuha og 716,480 ka botos ubos sa One Cebu Party.
Gani, matud sa taho, atol sa pagbisita ni Bise Gobernador Davide ni Gobernador Gwen, ang duha nagkasabot nga magtinabangay sila sa pagpadayon sa mga nagkalainlain proyekto sa probinsya. Lain pay komedya, si Bise Gobernador Davide mao ra ni junior (sorry sa uban junior), nga akong nailhan nga dili modumot og kaatbang bisan kaniadto nga nangabogar pa siya ug wala pa mosulod sa pulitika.
Si Atty. Vic Rodriguez, ang tigpamaba ni presumptive president Bongbong Marcos, nagpadayag sa miaging semana atol sa usa ka interview sa GMA-Radio/TV network, nga ang panggamhanan unya ni BBM way gipili nga color sa pulitika, nga kon sa iya pang pamulong inklusibo ang mosunod nga panggamhanan. Atong panghinauton nga matinuod ang gipamulong ni Atty. Rodriguez.
Hinuon, dili ta makapugong sa mga tawo nga giingon mga biktima kaniadto sa panahon nga imponer ang Martial Law sa atong nasud niadtong tuig 1972 hangtud 1986 diin napukan sa bloodless revolt sa katawhan ug gidala si kanhi presidente Ferdinand Sr. ug iyang pamilya didto sa Hawaii, USA ug napuli si kanhi presidente Cory Aquino, ang biyuda ni Ninoy Aquino.
Si Presidente Duterte, ang ika 16 nga presidente ning atong nasud, motapos ang termino sa Hunyo 30, 2022 ug mopuli si BBM ug iyang anak nga si Mayor Sara nga bise presidente sa atong nasud nga kauban sa miaging piliay ni BBM. Apan, naay daghan mga hungihong nga di maayo sa unsay sunod mahitabo unya kon maproklamar na si BBM nga ika-17 nga presidente ni atong nasud.
Manghinaut lang ta nga walay dautan nga mahitabo unya sa pag-asumir ni BBM nga ika-17 ka presidente sa atong nasud aron di mosamot og kaot-ot ning atong nasud, ilabina sa nagpadayon nga gubat sa Ukraine nga giatake sa Russia, nga nakaapekto sa ekonomiya sa tanan nasud.