Naangkon sa Pilipinas ang ikaupat nga puwesto sa 31st Southeast Asian Games sa Hanoi, Vietnam human nakakolekta og 52 ka gold, 70 ka silver ug 104 ka bronze medals ang Pinoy nga mga atleta.
Ang labing ulahing nakatunol og gold medals sa Pilipinas mao ang mga boksidor nga sila si Eumir Marcial, Rogen Ladon, ug Ian Clark Bautista.
Ang gymnast nga si Caloy Yulo mao ang labing bida sa kampanya sa Pilipinas gumikan kay nakatunol kini og lima ka gold medals.
Si national team chef de mission Ramon Fernandez mapasigarbuon sa naabot sa Pilipinas sa matag duha ka mga tuig nga kompetisyon.
Matod ni Fernandez nga mao kini ang labing taas nga naabot sa Pilipinas gikan niadtong 1983 sa mga edisyon sa kompetisyon nga gipahigayon sa laing nasod.
“We finished fourth place among 11 brother-countries in the region. This is our best finish since 1983 in a SEA Games event outside the Philippines,” post ni Fernandez sa iyang facebook account.
“As chef de mission, I am truly proud of this feat.”
Kadaghanan sa atletang mga Pinoy namalik na sa Pilipinas apan nagpabilin si Fernandez aron representahan ang nasod sa closing ceremony kagabii.
“This was an enlightening and educational experience for yours truly. We fought as one and won as one! Mabuhay ang atletang Pilipino!” dugang post ni Fernandez.
Kahinumdoman nga ang Pilipinas nahimong overall champion dihang mi-host kini sa kompetisiyon niadtong 2019. Niadtong higayuna, 149 ka gold medals ang nakuha sa nasod.