GIPANGMAKMAK og balik sa defending champions Golden State Warriors ang hosts San Antonio Spurs, 110-97, kagahapon sa Game 3 aron pagposte og dominanteng 3-0 nga bintaha sa ilang 1st round playoffs series sa National Basketball Association (NBA).
Nagbangutan man tuod ang Spurs sa kamatayon sa asawa ni coach Gregg Popovich nga si Erin apan ningkombati sila’g maayo apan wala ra gihapon magsilbe ang ilang paningkamot batok sa Warriors hilabi na sa 4th quarter. Ningkombati ang Spurs nga si Popovich.
Ang Warriors, nga padayong ningkombati nga wala ang ilang pambatong pointguard nga si Stephen Curry, gipangulohan ni Kevin Durant pinaagi sa iyang 26 puntos.
“It’s hard to think about that for me, personally, right now because there is other stuff bigger than basketball,” matod ni Spurs veteran Tony Parker.
Ang Spurs wala nagpakita og video tribute o nagpahigayon og ‘moment of silence’ alang kang Erin gumikan sa tatawng rason: dili maapektuhan ang ilang duwa sa ilang pagbangutan.
“We are all hurting,” batbat ni Spurs veteran Manu Ginobili. “We want to be next to Pop, we want to support him, but we’ve got to go out there and compete today. But, for sure, we are toiling. It’s not an easy day to be here.”
Ang Spurs gipangulohan ni LaMarcus Aldridge pinaagi sa iyang 18 puntos ug 10 rebounds.
Maayong nakaduwa ang Spurs sa 1st half apan sa pagpadayon sa kombati, wala ra gihapon sila nakasugakod sa puwersa sa Warriors.
“This was about what I expected,” matod ni Golden State coach Steve Kerr.
“First half they were getting after us like they did in Game 2 and we stayed with it, we had some bursts. The whole point is take care of the ball and defend over 48 minutes and things should work out.”
Pelicans 119, Trail Blazers 102
Sa New Orleans, nagpakatap og iyang playoff-best si Nikola Mirotic nga 30 puntos aron pangulohan ang kadaugan sa hosts Pelicans batok sa Portland TrailBlazers nga naghatag kanila og 3-0 sab nga bintaha sa ilang kaugalingong 1st round playoffs series.
Si Anthony Davis nidugang og 28 puntos ug 11 rebounds alang sa Pelicans, nga dako na og poruhan nga makasulod sa 2nd round sa labing unang higayon gikan niadtong 2008.
Sa kasaysayan sa NBA, wala pa’y team nga nakabangon gikan sa 0-3 nga biya sa best-of-seven series.
Ang TrailBlazers gipangulohan ni CJ McCollum pinaagi sa iyang 22 puntos, nihatag og 21 puntos si Al-Farouq Aminu samtang nidugang og 20 puntos si Damian Lillard.
76erS 128, Heat 108
Sa Miami, gipabugnaw sa Philadelphia 76ers ang host Heat sa Game 3 aron pagposte og 2-1 nga bintaha sa ilaha sab nga 1st round series.
Sa labing una pa lang niyang duwa sa playoffs, si Joel Embiid nagpakatap og 23 puntos aron pangulohan ang kadaugan sa 76ers, ningtampo og 21 puntos matag usa sila si Marco Belinelli ug Dario Saric samtang niamot og 19 puntos si Ben Simmons.
Ang Heat gipangulohan ni Goran Dragic pinaagi sa iyang 23 puntos samtang nihatag og 19 puntos si Justise Winslow. (AP, ESL)