Ikiha na karong adlawa Mayo 24, 2022 ang tutor sa 10 anyos nga batang babaye human ni masakpi pinaagi sa kuha sa hidden camera nga gimontar sa stepfather niini sulod sa lawak diin gihimo ang giingong rape.
Matod ni Police Lieutenant Colonel Maria Theresa Macatangay, information officer sa Cebu City Police Office, nga statutory rape ang isang-at nga kaso batok sa 41-anyos nga silingan ra usab sa biktima. Kay heinous crime man ang statury rape, way gitugot nga pyansa ang korte kon mapasaka na ang kaso.
Lig-on ang ilang ebedensiya nga gihuptan tungod sa video diin makita ang gihimo sa suspek bisan kon aduna kini pagtugot sa 10 anyos. Ang ngan sa suspek gipugngan ning mantalaan aron pagpanalipod usab sa identity sa bata.
Gibutyag ni Macatangay nga nitug-an ang bata nga gisugdan siya sa paghilabot sa suspek dihang siya nag-edad pa og 8 anyos, dihang nagsugod usab sa iyang pagtudlo sa module sa biktima.
Una nang nagduda ang mga ginikanan sa bata nga dunay dautang gihimo ang tutor sanglit lahi na kinig linihukan. Gumikan niini, ilang gibutangan og hidden camera ug diha na nila nasuta nga adunay gihimo ang suspek. Nasuta usab nila nga usa ka lisensiyado nga magtutudlo ang tutor.
Tungod niini, matod ni Macatangay nga ilang susihon kon asa siya konektado aron mopasaka silag kasong administratiba sa kompaniya kon asa siya nagtrabaho, gawas sa criminal nga kaso. Nasubo ang kapulisan sa nahitabo sa bata nga gisakyan ang kahuyang, nga gihulagway ni Macatangay nga linuog nga binuhatan sa usa ka magtutudlo.