Hatagan og financial assistance sa lungsod sa Tuburan ang pamilya sa bata nga nalumos sa Molobolo Spring sa Dominggo, Mayo 22, 2022.
“Ako na giingnan nga patagaan og assistance sa bata,” pasalig ni Tuburan Mayor Danilo Diamante kagahapon, Mayo 23.
Sa pasiunang imbestigasyon sa kapulisan, ang 13-anyos nga batang babaye nga taga Barangay Cogon, lungsod sa Tuburan giingong nitambong sa birthday celebration sa maong lugar diin kauban niya ang iyang manghod.
Atol sa pagpangaligo, giingong kalit nitidlom sa ilawom nga bahin sa tubig ang bata ug wa na kini maka haw-as.
Gihulagway ni Police Corporal Noel Villaceran sa Tuburan Police station nga mabaw lang ang tubig sa spring hinungdan nga mihimo sila og dugang pakisusi sa hinungdan sa kamatayon sa bata.
Ang biktima gisuwayan og tabang sa mga residente ug gidala sa tambalanan apan gideklarar nga dead-on-arrival.
Gipasabot sa mayor sa lungsod nga sirado pa ang maong spring sa mga bisita ug turista ilabi na nga padayon pa nga gi-renovate ang laing bahin niini alang sa hingpit nga pagbukas niini sa publiko.
Apan dugang niya nga dili kapugngan nga dunay mga residente ug mga bisita nga gustong maligo sa maong spring hinungdan nga molibot ug mamidpid kini aron makalusot sa dalan paingon sa maong spring.
Gawas nga kaligoanan kini, pipila usab sa mga residente ang manglaba sa dapit.
“Wala pa na gi-open for tourist...ang adult wa pa sad na gi ablihan. Manulod lang sa kilid, molusot lang ba naay uban manglaba na diha,” matod ni Diamante.
Gilaraw sa mayor nga papatrolyahan kini sa kapulisan ug sakop sa lokal nga kagamhanan aron malikayan ang susamang insidente.