Kapulisan sa siyudad sa Sugbo mopahugot pa sa ilang pagbantay sa mga metro sa tubig sa Metropolitan Cebu Water District (MCWD) human sa sunodsunod nga kawat nga nahitabo niini nga nakaapekto na sa serbisyo sa ahensya.
Niadtong Sabado, Mayo 21, ug Dominggo, Mayo 22, duha ang nadakpan sa mga sakop sa Sawang Calero Police Station 6 sa Cebu City Police Office (CCPO) samtang, laing duha ang nakadagan sa pag-abot sa awtoridad.
Unang nadakpan sa alas 3 sa kaadlawon sa maong adlaw sa dalan Tres de Abril duol sa usa ka pribadong tambalanan sa Barangay San Nicolas, siyudad sa Sugbo mao si Adrian Fortes Morris, 25, taga C. Padilla, Barangay Sawang Calero sa dakbayan sa Sugbo apan ang iyang kauban dali nga nakaikyas.
Nabawi sa mga pulis nga nag-roving sa maong dapit ang usa ka water meter ug liyabe sa tubo nga gamiton sa pagtangtang sa metrosan sa tubig.
Sa pagka Dominggo sa alas 2:20 sa kaadlawon, nadakpan ang laing kawatan sa mao gihapon nga lugar nga giila nga si Rodrigo Berdiflor, 18, taga Sitio Fooda, Barangay Guadalupe samtang nakaikyas si John Luke Abellanosa, 20, taga Sitio Osaka, Barangay Ermita.
Matod ni Police Lieutenant Colonel Maria Theresa Macatangay, information officer sa CCPO, nga ila na kining gihingusgan nunot sa nadawat nga report nga sunodsunod na ang nahitabong pagpangawat sa mga mitrosan sa tubig sa MCWD.
Dugang ni Macatangay nga nakig-alayon na sila sa buhatan sa MCWD aron masayran usab nila kung asa pa nga mga dapit sa dakbayan ang dunay daghang kaso sa pagpangawat sa ilang water meter aron ila kining ma tutokan sa ilang mga personnel.
Gawas niini, ipasubay ni Macatangay ang junk shops nga mamalit sa maong mga mitrosan sa tubig ug kon aduna silay masuta ila kining iapil sa pagkiha sa kalapasan sa Anti-Fencing Law.
Iyang giklaro nga kung walay mamalit sa maong mga mitrosan sa tubig wala usay mangawat tungod kay dili man kini mapuslan.
“Your police also checking and monitoring our kanang mamaligya og scrap metals if they are also engage in a buying of this type of items.If they are, they might become liable under the anti-fencing law,” matod ni Macatangay.
Si MCWD General Manager Stephen D. Yee nihangop sa lakang sa CCPO tungod sa nagkataas nga kaso pagpangawat og metro sa tubig nga nakaapekto sa serbisyo. Si Yee nipasalamat sa kapulisan sa dali nilang aksiyon.
Sa panagtambayayong sa kapulisan, ang MCWD naglaum nga sa madali mahunong na ang pagpangawat sa meters.