Usa ka 47-anyos nga lalaki gidunggab sa gawas sa iyang balay sa Sitio Cabil-isan, Barangay Taytay, lungsod sa Badian sa Dominggo sa gabii Mayo 22, 2022.

Si Staff Sergeant Dennis Sun, imbestigador sa Badian Police Station, niila sa biktima nga si Leonardo Paracuelles Rodiño, mangunguling, taga Sitio Cabil-isan, Barangay Taytay, Badian, Cebu.

Ang suspek giilang si Junrey Dinolan Laurel, 35, mag-uuma, taga sityo Cabil-isan sa nahisgutang barangay.

Si Sun nitug-an sa SunStar Cebu nga mga alas 10:40 sa gabii sa Mayo 22, 2022, nakadawat og tawag sa telepono ang ilang estasiyonan gikan sa usa ka concerned citizen bahin sa insidente sa pagpanunggab ug miresponde dayon sa lugar.

Matud ni Sun nga si Rodiño nagbuy-od sulod sa iyang balay nga nabulit sa dugo tungod sa mga samad dinunggaban sa wala nga bahin sa iyang lawas ug nakasulti ug nakasaysay sa nahitabong pagpanunggab.

Si Rodiño unang gidala sa Badian District Hospital sa Badian ug gi-refer kini sa Vicente Sotto Memorial Medical Center (VSMMC) sa dakbayan sa Sugbo.

Ang live-in partner sa biktima nga si Larabel Escoto Torres nibutyag nga adunay init nga panaglalis sila si Rodino ug Laurel. (GDC)