Ang dakbayan sa Lapu-Lapu ug lungsod sa Cordova mao ang duha ka local government units (LGUs) nga managsilingan sa isla sa Mactan.

Alang sa hiniusang kalamboan sa isla, ang reelected officials sa Lapu-Lapu ningpadayag sa kabukas sa pakigtambayayong sa bag-ong administrasiyon sa Cordova nga molingkod sa katungdanan sa kataposan sa Hunyo ning tuiga.

Sila si Lapu-Lapu City Mayor Junard “Ahong” Chan ug Bise Mayor Celsi Sitoy nitug-an sa SunStar Cebu nga bukas sila nga makigtambayayong sa umaabot nga administrasiyon ni Cordova mayor-elect Cesar “Didoy” Suan, kinsa mipildi ni incumbent Mayor Mary Therese “Teche” Sitoy-Cho sa bag-o lang natapos nga kinatibuk-ang eleksyon.

Si Chan niingon nga way problema ang pagtrabaho sa umaabot nga administrasiyon, kay sila “big brother” sa Cordova.

“Yes, of course. No problem. Even before... admissions, most patients sa atong hospital are from Cordova,” matod niya.

Gawas niini, namatikdan usab sa reelected mayor nga ang mga taga Cordova moagi sa dakbayan sa Lapu-Lapu kon moadto sa mga silingang LGU niadtong panahon nga wala pa matukod ang Cebu Cordova Link Expressway (CCLEX).

“I think there’s no problem. We must work hand-in-hand with Cordova and Lapu-Lapu City,” siya nidugang.

Hinuon, si Sitoy niingon nga magdepende kon ang bag-ong administrasiyon sa Cordova di mogukod sa mga tawo ni incumbent Mayor Teche.

“Depende kon ang bag-ong administrasyon magsige pagpanggukod sa mga tawo sa miaging administrasyon maapektohan gyud ko ug maapektohan pod ang administrasyon ni Mayor Ahong Chan diin ako kabahin,” matod sa bise mayor, ug nidugang nga bisan unsa nga aksiyon ang iyang himoon mahimong personal kini sa mahimong maapektuhan ang opisyal.

“Daghan man gud ang estorya nga gukuron sa bag-ong administrasyon ang mga empleyado ug mga negusyo sa mga negosyante nga milaban sa administrasiyon,” matod niya.

Gisuwayan pagkuha sa SunStar ang reaksyon ni Suan pinaagi sa iyang mobile number apan wala pa motubag ang mayor-elect bahin niini.

Sa panahon nga si incumbent Lapu-Lapu City Lone District Paz Radaza maoy mayor sa dakbayan niadtong 2016 hangtod 2019, siya ug ang mga Sitoy sa Cordova gikatahong dili maayo og relasiyon.