Gatusan ka mga maniskohay ug nanambong sa kalingawan sa live band nga kabahin kasaulogan sa kapistahan niadtong Sabado sa gabiii, Mayo 21, 2022, nasagmuyo human ang kalingawan sa Brgy. Napo gipaundang sa bise mayor sa dakbayan sa Carcar.

Pulitika ang pasangil sa kanhi barangay kapitan sa Napo, apan si Bise Mayor Nice Apura niingon nga ilang gipatuman ang ordinansa sa siyudad nga nagdili sa mga disco panahon ning Covid-19 pandemic nga way permit.

Si kanhi barangay kapitan Ronel Nacua nga nahinabi sa Superbalita Cebu nagkanayon nga tataw kaayo nga pulitika ang nagpaluyo sa pagpaundang sa kalihukan.

Sumala pa ni Nacua nga usa siya sa mga organizer sa private sector nga ni-sponsor sa awarding ceremony sa mga mananaog sa inter-barangay basketball tournament open category.

Samtang nag-awarding, duna say live band aron mas dasig ang kalihukan. Ang kalihukan nakalinya subay sa kapistahan sa ilang patron nga si San Isidro Labrador.

Gani nananghid sila sa konseho sa barangay nga niaprobar usab. Ang open court gipanag-iya sa pribado nga tawo apan gigamit sab sa barangay sa mga kalihukan niini.

“Tataw maingon nato nga dunay pulitika nga nagpahipi kay nganong ang ubang barangay sama ra ang kalihukan wala paundanga,” dugang ni Nacua.

Gipadayag niya nga gi-single out sila sa kasamtangang administration sa mga Apura kay giuyonan na unta kini sa barangay, apan gipaundang.

Si Bise Mayor Apura nga nahinabi sa Superbalita Cebu nagkanayon nga dili pulitika ang iyang kamandoan.

Sumala pa niya nga tataw kaayo ang city ordinance nga nagdili niini ug wa pa malibkas.

“Kana iyang pagarpar ba, pagsalig guro siya sa kalihukan, unya wala may permit, ato gipaundang,” dugang ni Apura.

“Ang among gibasihan balaud, dunay ordinansa, asa man ang pulitika ana karon?,” dugang sa bise mayor.

Si Kapitan Roderico Sonsona gitawgan unta sa Superbalita Cebu apan dili makontak ang iyang cell phone.

Si Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nagkanayon nga igo ra sila nituman sa ilang trabaho pagpatuman sa ordinansa.

Sumala pa niya nga si Konsehal Jay Garcia maoy nitawag kaniya nga si Vice Mayor Apura nimando nga ipaundang ang kalihukan kay nakalapas sa City Ordinance no. 36-2020 nga nag-ban sa pagpahigayon sa disco/public dance o sa samang mga kalihukan.

Matud ni Cabagnot nga giestorya sa iyang personnel ang nagdala sa kalihukan nga dunay reklamo base sa ordinansa.

Gipatukar nilag ka lima ang banda atol sa awarding, dayon ilang gidala ang dagkong sound system “for safekeeping.