PADAYON ang pag-ubos sa ihap sa bag-ong mga kaso sa coronavirus disease-2019 (Covid-19) sa Cagayan de Oro human nakatala ang dakbayan og usa ra ka kaso sulod sa duha ka adlaw.

Matud sa City Health Office, ang usa ka lokal nga index nga kaso usa ka 73-anyos nga lalaki residente sa Barangay Nazareth.

Miabot sa 25,860 ang kinatibuk-ang ihap sa mga kaso sa Covid-19 sa dakbayan.

Padayon usab ang pag-ubos sa ihap sa mga aktibo nga kaso sa Cagayan de Oro. Adunay lima ra ka mga aktibo nga kaso ang dakbayan, pulos mga outpatient.

Nakatala usab og upat ka coronavirus-positive nga mga kaso nga karon naka-recover human nagnegatibo ang resulta sa ilang repeat swab tests.

Anaa na karon sa 24,914 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad nagpabiling anaa sa 941.