Giingong gun for hire patay kay napusilan sa pulis dihang iyang gipusil patay ang lalaking ahenti og yuta alas 12:30 sa kaadlawon sa Martes, Mayo 24, 2022 sa Barangay Luyang, lungsod sa San Remigio, amihanang Sugbo.

Ang biktima giila nga si Franklin Capuno Sayson, 48, taga Barangay Estaca, lungsod sa Compostela, Sugbo. Apan napatay usab sa usa ka pulis ang suspetsadong gun for hire nga si Verlito Maralas Marianito, 54, alyas Inting, sa Barangay Victoria, San Remigio kay nabawsan.

Naangol ang kaubang suspetsadong gun for hire nga si Rowen Dela Peña Cose, 29, taga Barangay Maravilla, lungsod sa Tabuelan. Si Cose samdan sa sampot sa iyang pag-eskapo human naigo sa pagpusil ni Police Corporal Laong Laang Toring, sakop sa alert team sa Bogo City Police Station. Nasikop usab ang gitumbok nga mastermind nga si Grace Fable, alias Boy, taga Brgy. Victoria, San Remigio.

Si Fable ugangan (mother-in-law) ni Toring kay ang asawa sa pulis anak sa naha-una.

GIPUSIL

Si Police Major Ian Macatangay, hepe sa San Remigio Police Station nga nahinabi sa Superbalita Cebu, nagkanayon nga si Sayson sakay sa motorsiklo sa pagduaw sa nahisgutang lugar diin dunay gihaya.

Sila si Marianito ug Cose nagsunod kaniya nga nagsakay usab og motorsiklo. Sa paghunong ni Sayson dihang nahatungod sa gihayaan, nikanaug usab si Marianito dayon gipusil ang biktima.

Dihang natumba si Sayson, gitiwasan pa kini ni Marianito.

Niadtong higayuna, si Toring nagbilar usab sa haya kay paryente sa iyang asawa, nakadungog sa unang mga buto sa pusil.

NIRESPONDE

Sa iyang pagsusi, iyang nakit-an si Marianito nga nipusil kang Sayson, kinsa nagligdas na sa karsada. Gipusil ni Toring si Marianito, kinsa naigo ug namatay diha-diha.

Si Cose maoy gisunod sa pagpusil ni Toring ug naigo sa lubot, apan nakaeskapo gihapon bisan kon samdan biniyaan ang motorsiklo.

Si Cose nidangop sa usa ka balay sa Barangay Victoria, sikbit sa Luyang, apan nihangyo sa mga tag-iya sa balay sa pagtawag sa mga pulis kay siya motahan.

Mga alas 5:30 sayo sa buntag nadakpan siya sa San Remigio Police ug Bogo Police.

UGANGAN NAGSUGO

Si Cose nitug-an kinsa ang mastermind sa pagpatay atol sa tactical interrogation ug nitumbok kang Fable.

Matud ni Macatangay nga si Cose nibutyag nga gisuhulan sila og P25,000 ni Fable. Nahibaw-an nila nga si Fable nasagmuyo kang Sayson kay wa mamahin sa iyang commission sa halin sa yuta nga mobalor og P13.5 million.

Si Fable nipahibawo kanila, base sa text message, nga naa si Sayson sa dapit. Si Fable nitambong sa haya sa iyang paryente ug maoy ni-text kang Sayson nga magkita sila sa haya sa Brgy. Luyang. Apan wa siya makapahimangno sa duha nga naa ang iyang umagad nga pulis.

Human niini, ilang gidakop si Fable sa Martes sa buntag ug gitanggong sa bilanggoan.

Si Macatangay nibutyag nga si Marianito nalakip sa ilang listahan nga nalambigit sa ilegal nga drugas.