Gipirmahan ni Presidente Rodrigo Duterte ang balaod nga nagpanalipod sa mga katungod sa mga giabandona o gibyaan nga mga bata nga wala mailhi ang mga ginikanan.
Mao kini ang Republic Act No. 11767 nga napirmahan ni PRRD niadtong Mayo 6. Mas giila ang balaod isip “Foundling Recognition and Protection Act”.
Subay sa maong balaod, ang usa ka abandoned child giila isip usa ka natural-born citizen.
Kini maoy tubag sa isyu kaniadto kabahin sa citizenship sa mga susamang bata lakip na niini si Senador Grace Poe-Llamanzares.
Gikwestiyon ang pagka-Pilipino sa senadora niadtong nagpapili kini isip presidente sa 2016 national alections.
Hinuon, mihukom ang Korte Supreme sa Pilipinas nga si Grace Poe usa gayod ka Pilipino nga qualified nga modagan isip panguo sa nasod.
Dugang pagpasabot sa balaod mao nga ang usa ka abandoned nga bata nga makit-an sa Pilipinas o mga embahada,
konsulada, ug uban pang teritoryo sa Pilipinas gawas sa nasod kay gi-presume nga usa ka “natural-born” citizen bisan unsa pa ang sirkumstansiya sa pagkatawo ini.
Kini nagpasabot nga ang abandoned child dunay susamang katungod sa mga Pilipino nga natural-born citizen, pagwagtang sa diskriminasiyon ug mga kalisdanan nga ilang nasinati sa wala pa ang balaod.
Mahimo rang makwestyon ang citizenship status sa abandoned child kon dunay igong ebidensya nga dunay “foreign parentage” o dugong langyaw ang maong bata.
Duna poy mga katungod nga gilagda sa maong balaod alang sa mga “deserted” children ug mga proseso alang sa saktong pagsagop sa mga bata.
Maayong kalambuan ang pagpasar sa maong balaod isip dugang child protection laws sa pagpanalipod sa tanang klase sa mga bata sa Pilipinas.
Sa laing bahin, ipahigayon na karong Sabado, Mayo 28, ang Dinner for a Cause nga gi-organisar sa Children’s Legal Bureau (CLB) aron pagtapok sa tanang advocates agig pagsuporta sa among organisasyon.
Kini isip pagsaulog sa ika-25 nga kasamuran sa pagkatukod sa CLB.
Ang maong panagtigom himuon sa Aula Magna Hall, Basilica Minore del Santo Nino, Cebu City.
Niadtong Mayo 28, 1997, namugna ang CLB aron sa pag-abag sa pagpanalipod sa mga bata ug kabataan ingon man sa pagduso ug pagpalanog sa ilang mga katungod.
Sa kantidad nga dos mil singko pesos (Php 2,500.00) matag tawo, makatabang na kini sa panudlanan sa organisasiyon labaw na sa Children’s Defense Fund. Limited lang ang mga ticket sa maong event.
Alang sa dugang detalye, padayon kamo sa pagbisita sa among Facebook page, o pag-email sa clbsilver@clb.org.ph. Mahimo sab nga i-contact si Weng Aballe (Mobile # 0977-162-2261)
[Sinulat ni Atty. King Anthony Perez, usa sa mga abogado sa Children’s Legal Bureau. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]