Diputado: Sugdan na sa pag-ukay Cuentas claras

Diputado
Diputado

Human sa piniliay, daghan ang nalipay, daghan sab ang naguol. Nalipay ang nakadaog, ingon man ang ilang leaders ug supporters.

Naguol sab ang mga napildi, apil ang ilang mga abay. Natural lang ang ilang gibati kay mao man gyod na ang mahitabo sa piniliay, modaog o mapildi.

Ang dakong problema kadtong miapil sa kalandrakas sa pulitika kay napugos lang, sama sa casual workers. Maingon nga napugos lang kay kon dili sila moapil sa kampanya, taktakon man pod sila.

Ang uban mokuyog sa kampanya, ang uban sab moapil sa drama sa Facebook, moapil sa mga trolls. Ang trabaho nila mao ra ang pagpangita og buling o hugaw nga issue dayon banatan na dayon ang kakontra.

Kon napildi ang ilang gilabanan, seguradong huyhoy ang mga abaga kay maapil man sila sa gitawag og tamjun o taman lang sa June. Inig ka Hulyo, wala na silay trabaho kay di na man i-renew ilang kontrata.

* * *

Didto sa Bohol, nagsugod na ang proseso sa pagpuli sa mga bag-ong napili nga lideres.

Midaog sa makabungog nga kadaogan si Gov-elect Aris Aumentado samtang giparot ang kasamtangan nga naglingkod sa Kapitolyo nga si Gov Art Yap.

Mao sab kini ang nahitabo sa kasamtangan nga Bise Gobernador, Rene Relampagos, nga gilubong sab sa balota ni Vice Gov-elect Dionisio Victor Balite.

Adunay transition team nga gitukod si Aumentado pinangulohan ni Atty. Handel Lagunay.

Matod pa ni Lagunay, apil sa ilang trabahuon mao ang pagbukiki sa budget ug financial condition sa Probinsiya sugod adtong panahon sa paglingkod ni Yap hangtod karon.

Gihimo kini tungod sa giingong daghan nga katingad-an nga mga transaksiyon nga gihimo si Yap, apil na ang wa’g tuo nga mga pagpangutang.

Ilang susihon kon giunsa ni Yap ang maong mga kwarta nga inutang, apil na ang mga gipamalit sa Probinsiya sa kampanya batok sa Covid.

* * *

Nindot kining maong balita kay apil sa transition team nga gitukod ni Aumentado si Willy Ramasola nga usa sa mga gigukod ni Yap tungod sa mga batikos niini sa Facebook batok sa giingong mga kahiwian ni Yap.

Gani, gikiha pa ni Yap si Ramasola sa kaso nga Inciting to Sedition, gumikan sa mga gi-post ni Ramasola sa iyang ilado na kaayo nga Facebook account.

Tungod kay kauban na man siya sa Transition Team, nagtuo ako nga daghan kaayo og ika-contribute si Ramasola nga kaalam sa pagsusi sa maong mga transaksiyon, aron mahibaw-an gyod ang kamatuoran.

Kahinumdoman ra ba, dihay pipila ka cabinet secretaries ug governors nga mipadayag sa ilang dakong pagdayeg sa kakayahan ug kahanas ni Yap sa pagpadagan sa ekonomiya ug patigayon sa Bohol.

Kon dunay daghang anomaliya nga makit-an ang grupo ni Lagunay, di ba kaha bakikaw paminawon nga ang ilang idolo nga si Yap nag-atubang na og mga reklamo? Nangutana lang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph