Usa 59 anyos nga lalaki posibleng didto na magsaulog sa prisohan sa iyang pagsugat sa ika 60 anyos nga pangidaron human siya nasikop tungod sa kasong rape nga way gitugot nga piyansa ang hukmanan alang sa iyang temporaryong kagawasan.
Ang grupo ni Police Lieutenant Colonel Humobuno Sayon, force commander sa Bohol Provincial Force Mobile Company (BPFMC), uban ang kapulisan sa lungsod sa Sierra Bullones sa Bohol ug Nasipit Police Station sa Agusan Del Norte, nisikop kang Gerardo Felias, sa Martes sa alas 9:30 sa buntag, Mayo 24, 2022.
Si Felias didto na nitago sa Brgy. Culit, lungsod sa Nasipit, Agusan del Norte sulod sa upat ka mga tuig.
Alas 9:30 sa buntag sa Martes, Mayo 24,2022 giadto sa mga pulis ang balay sa suspek nga si Gerardo Felias, nga didto na nag tago-tago sa Barangay Culit sa lungsod sa Nasipit probinsiya sa Agusan Del Norte.
Kini human siya gipasakaan og kasong rape.
Si Felias nag atubang og tulo ka mga kasong rape sa sala ni Judge Patsita Sarmiento Gamutan, presiding judge sa Branch 51 sa Regional Trial Court (RTC) sa lungsod sa Carmen, Bohol.
Ang warrant of arrest nigawas niadtong Mayo 28, 2018.
Gipaabot nga karong adlawa, Mayo 25, maabot siya sa Bohol human siya ug ang mga pulis ningsakay og barko kagabii sa Martes.
Way dugang mga impormasiyon nga gihatag ang kapulisan sa kaso ni Felias.
Ang kapulisan nipahugot na sa paggukod sa mga tawo nga wanted sa nagkadaiyang mga kaso.