Amerikano naangol sa pagpamunal og botelya sa iyang kababayang Kano samtang British national nasunggo ang ilong human gisukmag sa suspek nga Kano nga maoy namunal og botelya.
Away giingong nagsugod sa kalangas sa duha ka mga langyaw.
Matud ni Police Senior Master Sergeant Jeptha Jumawan, imbestigador sa Abellana Police Station sa Cebu City Police Office, nibutyag nga ang suspek nga si Jack Raymond Wilson, 45, usa ka retired nga sakop US Army, kinsa gialarma sa iyang mga kauban ug gidakop kay namunal ug nanukmag og mga kaubang langyaw.
Si Wilson lumad nga taga Wisconsin, USA ug kasamtangang nagpuyo sa Ingles V.Rama, Barangay Guadalupe, siyudad sa Sugbo.
Samtang ang duha ka mga biktima nga ningreklamo batok kang Wilson mao sila si Llyod Bryan Heyland, 48, American national, kasamtangan nga nagpuyo sa OPR Newtown Blvd. Mactan, dakbayan sa Lapu-Lapu, ug si Mark Anthony Castilino, British national, taga Grand Cenis Res., Barangay Camputhaw, Siyudad sa Sugbo.
Matud ni Jumawan nga pasado alas 4:00 sa kadlawon sa Lunes, girespondehan sa iyang mga kauban ang usa ka bar sa Barangay Cogon Ramos, Siyudad sa Sugbo kon diin naglalis ning tulo ka mga langyaw.
Nagpatabang na ang nagduma sa maong bar tungod sa panaglalis.
Dugang ni Jumawan nga nagduwa og billiard si Wilson apan tungod kay gisabaan sa duha pa ka laing langyaw, giingong wala motuo ang duha hinungdan nga niduol si Wilson ug gibunalan og botelya si Heyland.
Si Castilino nga nangutana kang Wilson kon nganong ingon ana ang iyang taras, wala palabya sa Kano, gisukmag na hinuon hinungdan sa pagkasunggo.
Ang pulis sa Police Station 2 ningdakop kang Wilson samtang giimbetahan usab ang duha ka mga biktima.
Si Wilson sa samang adlaw gipagawas ra usab sa mga pulis human nakapyansa og P10,000 ug niisyu og release order si Executive Judge Jennelyn Forrosuelo sa Branch 4 sa Municipal Trial Court in Cities (MTCC).
Matud pa ni Jumawan nga bisan kon wala pa nakapasaka og kaso ang duha ka mga biktima, apan sa balaod alang sa mga langyaw gihatagan sila og pribilihiyo nga makahatag og bond aron temporaryo unang makagawas sa bilanggoan kon sila dunay kasong atubangon sa hukmanan.