Giawhag sa kagamhanan sa dakbayan sa Talisay ang mga residente sa siyudad nga moabag sa kagamhanan pakigbatok sa dengue taliwa sa nagsakang mga kaso nga dala sa lamok.
Gipahibaw ni Dr. Lino Alanzado, health officer sa siyudad, nga nagpadayon ang pagpahigayon og misting sa mga barangay aron mapugngan ang pagdaghan sa mga lamok.
Pasiuna na silang nipahigayon og misting sa Barangay Cansojong, Dumlog, San Roque ug Tabunok.
“...sa karon is by request pa ang among gihimo kay karon is limited ang misting machine. Sa una and before sa pandemic, walo ang nagamit and sa pag disinfect, nagamit sad ni siya so isa na la’y nabilin karon,”matod ni Alanzado
Ang dakbayan sa Talisay nalakip sa lista nga may taas nga mga kaso sa dengue ning tuiga.
Base sa datos sa siyudad gikan sa Enero 1 hangtod sa Mayo 7 ning tuiga, natala niini ang 177 ka mga kaso, duha ang nangamatay.
Hinungdan nga giawhag ni Alanzado ang mga Barangay Health Workers (BHW) ug chairman sa komitiba sa panglawas sa konseho nga ipadayon ang pagpatuman sa mga residente sa 4S kontra dengue.
Kini ang upat ka mga paagi sa Department of Health (DOH) aron nga mapugngan ug malikayan nga mataptan sa sakit.
Kini nagkahulogan sa search and destroy, secure self-protection measures, seek early consultation ug support indoor and outdoor spraying .
“...permi ta nga manghinlo sa palibot then kon pwede tabang ta, kanang naay mga lim-aw nga tubig, limpyohan lang ilabi na sa sulod sa panimalay,”dugang ni Alanzado.
Gibutyag usab sa doktor nga usa sa hinungdan kon nganong motaas ang mga kaso kon dili masusi ang pasiyente tungod sa kahadlok sa pagpaubos sa swab test sa mga health center.