Kapin sa 600 ka mga personnel sa Cebu City Police Office (CCPO) ang napaubos na sa kinalit nga drug test human laing 60 ka pulis nga nadestino sa Drug Enforcement Unit (DEU) sa matag police station ug special unit gipatawag aron susihon kon dili ba sila tiggamitan sa illegal nga drugas.
Gipa report ang 60 ka personnel sa 11 ka police stations ug special unit sa Martes sa buntag, Mayo 24, 2022.
Apan sa pag-abot sa Camp Sotero Cabahug sa dalan Gorordo, kalit sila nga gipaubos sa drug test sa PNP Crime Laboratory 7 aron masuta kon aduna bay tiggamitan sa illegal nga drugas kanila.
Matod ni Police Lieutenant Colonel Wilbert Parilla, deputy director for administration sa CCPO, nga ang pagpaubos sa drug test sa 60 ka personnel kabahin kini sa programa sa Philippine National Police nga internal cleansing sa ilang hut-ong.
Gitinguha sa hepe sa CCPO, Police Colonel Ernesto Salvador Tagle, nga ang iyang tanang mga sakop mapaubos sa drug test sa dili pa matapos ang 2022.
Gipahibawo hinuon ni Parilla nga sa pagkakaron sobra na sa katunga sa kinatibuk-ang pwersa sa CCPO ang na drug test na.
Kon adunay mag positibo nga mogamit sa illegal nga drugas, ipaubos nila kini sa summary dismissal sa Regional Internal Affairs Service (RIAS) sanglit grave offense ang maong salaod.
“Usa ni sa mga program sa PNP nga ipa undergo gyud og random drug test ang tanang personnel aron mahibaw-an kon wala bay tiggamitan og drugs, but so far wala pay nag positive nila,” matod ni Parilla.
Kahinumdoman nga sa tanang nag positibo sa drug test sa CCPO sa miaging tuig pulos na nangatangtang sa serbisiyo.
Bug-at ang silot kon ang usa ka pulis masakpan nga mogamit og shabu o ubang matang sa ginadili nga drugas.
Gibutyag usab ni Parilla nga wala pa sila naka monitor nga aduna silay mga sakop nga nagumon sa pag gamit sa illegal nga drugas.