Dugang hydro ug geothermal power plants ang tukoron sa Visayas aron makahatag og dugang suplay sa kuryente nga gikan sa renewable energy.
Si Director Russ Mark Gamallo, sa Department of Energy (DOE) Visayas, nagkanayon nga nagpadayon ang paghimo sa feasibility study sa hydro power sa Western Visayas samtang aprobado na ang laing geothermal power plant sa Carigara sa Leyte.
Ang maong mga tinubdan sa renewable energy maoy mapuno sa naunang geothermal power plant sa Ormoc City ug Kananga, Leyte nga nag-produce og 500 megawatts matag planta.
Duna say solar power plant sa Negros Occidental ug sa Toledo City, hydro power plant sa Sugbo nga nahimutang sa Badian, Barili ug laing hydro power plant sa Loboc, Bohol apan ang ilang kapasidad ubos sa 1 megawatt.
Laing tinubdan sa renewable energy nga gibutyag ni Gamallo mao ang wind farm nga nahimutang sa Aklan ug sa San Lorenzo sa Guimaras Island nga maoy gikuhaan og supply sa kuryente sa ilang lalawigan.
Gitug-an sa director sa DOE nga ang nahisgutang mga RE power plant konektado sa Visayas grid pinaagi sa submarine cable ug maoy gikuhaan og dakong enerhiya nga gigamit dinhi sa Sugbo.
Matod pa ni Gamallo nga adunay igong suplay ang Visayas batok sa panginahanglan sa katawhan sanglit aduna kini capacity nga 2,518 megawatts itandi sa 2,220 megawatts nga kasamtangang panginahanglan.
“Stable pa gyud kaayo ta diri sa supply sa Visayas, wa tay nakita nga possible problem sa atong supply,” padayag ni Gamallo. Ang DOE director sa Visayas nagkanayon nga ang pagdiskobre og bag-ong tinubdan sa renewable energy maoy tubag sa gobyerno aron malikayan ang posibleng kakuwangan sa panginahanglan sa umaabot nga panahon.
Sa miaging semana, ang mga opisiyal sa DOE ug Presidential Communications and Operations Office sa Manila tuyo nga nianhi dinhi sa Sugbo para paglusad sa ilang kampanya paggamit sa RE nga nagdala sa #EnerhiyangAtin information drive sa SM City Cebu sanglit dako kini og ikatabang sa ekonomiya sa usa ka nasod.