Kapulisan sa siyudad sa Sugbo nakitagbo sa mga lider sa Carbon public market aron paghangyo nga tabangan ang Kagamhanan sa Dakbayan nga mapadayon ang pag-modernize sa publikong merkado ug likayan ang pagpahigayon og rally batok sa maong proyekto.
Kini maoy awhag ni Police Lieutenant Colonel Wilbert Parilla, bag-ong milingkod nga deputy city director for administration sa Cebu City Police Office.
Iyang gipasabot ngadto sa maong mga lider nga likayan ang pagpahigayon og rally sa tuyo nga babagan ang maong proyekto sanglit kaayohan man kini sa tanan.
Kadtong adunay reklamo, ipaabot lang kini sa hingtungdang buhatan sa Cebu City hall.
Gipahibawo usab ni Parilla nga ilang gipaminaw ang mga reklamo ug kabalaka sa mga manindahay sa Carbon nga kon mobalhin na sila sa modernong merkado, mosaka ang ilang abangan itandi sa ilang naandan nga bayrunon.
Apan gipasabot sila nga kon pilay ilang bayranan karon, mao ra usab kini sa ilang balhinan nga pwesto dungan sa pasalig nga walay mabiyaan kay silang tanan ang mahatagan og luna nga una nang gisaad sa milabay nga administrasiyon.
Gawas niini, gihangyo usab sila nga dili okupahon ang tibuok karsada nga nagpalibot sa Carbon aron di mabalda ang trapiko.
Gibutyag ni Parilla nga magdugang silag mga personnel sa Carbon uban sa abag sa mga barangay tanod ug traffic enforcers nunot sa pag bukas matag hapon sa mga kan-anan sa maong merkado nga gipanglantawan nga dugokon sa mga tawo.
Nagpatabang usab sila sa pagmonitor sa mga notadong manglabnihay sa maong lugar aron mahipos kini ug mahimong luwas ang mga turista nga moduaw sa Carbon public market.