Kapulisan sa siyudad sa Sugbo mo-focus na sa ilang kampanya batok sa kriminalidad human nigara na usab ang kaso sa pagpanglabni ug tulis sa gawas sa IT Park sa Barangay Lahug, dakbayan sa Sugbo.
Gumikan niini, tanang station commanders gimandoan sa pag-monitor sa mga kaso sa pagpanglabni sa ilang hurisdiksiyon.
Sa usa ka post sa Facebook page ni Astra Castra nga aduna nay kapin sa usa libo ang nikomento ug kapin sa 3,000 ang ning-share, makita ang video sa usa ka wala mailhing lalaki nga nisuway sa pagkuot sa bag sa gituohang call center agent nga nagtrabaho sa usa sa mga kompaniya nga nagbase sa IT Park.
Nagbaktas kini pagawas ug dihang niabot sa atbang sa usa ka inilang hotel sa Lahug gikuot ang bag niini, apan napakgang ang gihimo sa lalaki tungod sa singgit sa nag-post nga adunay tulisan.
Iyang gibutyag nga sila usab hapit mabiktima sa maong tawo nga tungod niini nitabok sila sa dalan aron panid-an ang maong lugar.
Wala pa mag-usa ka minuto, nibalik ang mangunguot ug manguot na pud unta dihang nakuha sa ilang video.
“Nakabantay ko nga naay nanghilabot sako bag, then paglingi nako kay nakalitan man siya ug niaksiyon balik sa agi. Naabli gamay akong bag pero wala ray nakuha. Dili sad mi ka-accuse dayon kay walay lain nakakita and wala na iyang kamot sa bag paglingi nako. Wala rapuy nawala,” matod sa tipik sa post ni Astra Castra.
Tungod niini, matod ni Police Lieutenant Colonel Wilbert Parilla, deputy city director administration sa Cebu City Police Office (CCPO) nga parovingan na niya kanunay ang lugar sa mga pulis nga nadestino sa duha ka outposts nga naa sa sulod IT.
“Before pa sa pandemic duna sad tay daghan nga report dinha sa snatching specially sa mga nagtrabaho og pang gabii, kining sa mga call center kon inig panggawas, pang atngan mao na nga gibutangan gyud nato diha og ilahang kaugalingon nga substation, mao na nga ila nasad i-focus sa anti-criminality ang ilang mga tawo,” matod ni Parilla.
Giangkon ni Parilla nga nakadawat na silag impormasiyon nga sukad mibalik na sa normal migara na usab karon ang mga manglabnihay ug manguotay apan wala modangop sa mga police station ang mga biktima.
Tungod niini, iyang gipaalerto ang tanang station commanders nga tutukan na usab nila ang maong matang sa krimen sanglit nakabalik naman ang mga personnel nga gi-deploy alang sa eleksiyon.
Ilang gipangsubay kon ang mga manglabnihay ga menor de edad ba sanglit duna na silay koordinasiyon sa Operation Second Chance nga kon ilang madakpan, idiretso nila kini sa maong pasilidad.