Nangayo og pasaylo ang Samahang Basketbol ng Pilipinas (SBP) sa kapaksayan sa Gilas Pilipinas pagsakmit og gold medal sa men’s basketball event sa bag-uhay lang nahuman nga 31st Southeast Asian Games sa Hanoi, Vietnam.
Ang SBP, nga maoy basketball governing body sa Pilipinas, miduyog sa kasagmuyo nga gibati sa Filipino basketball fans human gipakaging ang Gilas sa Indonesia, 85-81, sa inilugay og gold medal nga kombati.
Mao kini ang labing unang higayon gikan niadtong 1989 nga wala nakalabni og gold medal sa men’s basketball ang Pilipinas sa matag duha ka mga tuig nga kompetisyon.
Naputol sab niini ang 13 ka sunodsunod nga mga edisyon nga nakalangkat og gold medal ang Pilipinas sa labing kinaham sa mga Pinoy nga natad sa paugnat sa kusog.
“We at the Samahang Basketbol ng Pilipinas share the disappointment of our Filipino basketball fans and take full responsibility with the results of our 31st Southeast Asian Games campaign,” opisyal nga pamahayag ni SBP president Al Panlilio nga napatik sa nagkadaiyang news outlets.
“We apologize we fell short and were not able to give our teams better support that they needed to retain the Gold.”
Gipasalig ni Panlilio nga mohimo sila og lakang aron makabangon ang Gilas ning maong pagkapandol.
“There are no excuses and we’ve learned valuable lessons. We will bounce back and reclaim our spot to stay ahead,” dugang ni Panlilio.