Usa ka drayber sa traysikol gipusil-patay sa ni-absent without leave (Awol) nga sakop sa Philippine Army sa Barangay Lindogon, lungsod sa Sibonga, alas 10:20 sa buntag sa Martes, Mayo 24, 2022.

Ang biktima giilang si Daido Rufo, 34, ulitawo, molupyo sa nahisgutang lugar.

Ang suspek nga nisibat human sa hitabo giila sa kapulisan nga mao si Jason Pallacios, hingkod ang panuigon, Awol nga sakop sa Army, taga Barangay Simala, lungsod sa Sibonga.

Si Police Major Rodgene Fudotan, hepe sa Sibonga Police Station nga nahinabi sa Superbalita Cebu, nagkanayon nga sila si Rufo ug Pallacios nag-abot sa tindahan nga palitanan og puso.

“Naglalis daw ni sila, naglinya nag-abot sa palitanag puso. Medyo gidibdib sa suspek kay giingnan nga maglung-ag pa lang ka sa inyuha,” dugang ni Fudotan.

Niuli si Pallacios ug niadto sa balay sa biktima nga nagsakay og motorsiklo.

Sumala sa kabanay sa biktima, si Pallacios nangita kang Rufo ug ilang gitug-anan nga naligo sa banyo.

Dugang sa mga saksi, si Pallacios nisud sa banyo ug gipusil ang biktima.