Malipayong pagpanuroy sa usa ka pamilya sa Little Switzerland sa Barangay Manipis, dakbayan sa Talisay nisangko sa masulub-ong hitabo sa ilang pagpauli human nahaybol ang gisakyang motorsiklo sa dulhugong dan sa Sitio Campinsa, Barangay Tapul niadtong Martes sa hapon, Mayo 24.
Namatay ang 28-anyos nga inahan samtang nangaangol ang 25-anyos nga amahan ug ilang 3-anyos nga anak nga batang lalaki.
Si Jonathan Tumulak, hepe sa City of Talisay-Traffic Operation Development Authority (CC-TODA), niila sa namatay nga si Danica Gasalan, 28, asst. store manager sa supermarket sa dakbayan sa Sugbo.
Giila ni Tumulak ang kapuyo nga si Paul Rollorata, 25, ug ilang anak nga si Paul Henzon Rollorata, 3.
Matod ni Tumulak, daghang manuroy sa Little Switzerland isip tourist spot sa bukirang dapit sa dakbayan.
Samtang ang pamilya mouli na unta sa ilang dapit sa Barangay Tabunok, apan nawad-an og kontrol ang amahan nga nagmaneho sa motorsiklo human wala na mogana ang prino hinungdan nga nahaybol sila sa grabe kadulhugong dalan.
Dugang ni Tumulak, unang nibangga ang motorsiklo sa laing motorsiklo nga nag-park sa daplin, niigo sa usa ka babaye, una niambak sa riprap.
Ang mga biktima gipangdala sa tambalanan, apan si Danica gideklarar nga dead on arrival (DOA) sa doktor.
“Ang iyang motor is 125cc, automatic nga motor. Sakay ning tulo. Sa ako lang nahibal-an ang bana, naka-helmet,” dason ni Tumulak apan wa makaseguro sa angkas.
Gipasabot ni Tumulak nga wala kaayo silay nadawat nga dunay daghan nga mga aksidente sa dapit apan nipahimangno siya sa mga moduaw sa lugar nga maanindot og talan-awon nga maneguro sa pagmaneho ug maghinay sa pagpadagan.
“Mas maayo kon makaya man gani sa imong motor, mas maayo nga i-engine break unya sige ka og kupotkupot sa imong manubela ilabi na ug ting-ulan gyud,” dugang ni Tumulak.