Diriyot naputol ang liog dihang napalgan ang 67-anyos nga biyuda human gigulgol sa wala mailhing tulisan ug gihulog sa pangpang sa Barangay Greenhills, lungsod sa San Fernando, habagatan sa lalawigan sa Sugbo, alas 11:30 sa buntag sa Huwebes, Mayo 26, 2022.
Ang biktima nga napalgan sa iyang silingan ubos sa pangpang giilang si Diomedesa Lapera Gedaro, 67, negosyante og utanon, residente sa lugar.
Si Police Staff Sgt. Paul Baclay sa San Fernando Police Station nga nahinabi sa Superbalita Cebu nagkanayon nga ang mga sakop sa Municipal Disaster Risk Reduction Management Office (MDRRMO) sa San Fernando maoy nipahibalo sa kapulisan sa alas 12:00 sa udto kagahapon.
Ang mga sakop sa Alert Team sa San Fernando Police Station daling nirespondi sa lugar ug sa ilang pasiunang pakisusi, dunay foul play sa kamatayon sa biktima human klaro nga gigulgol ang liog niini nga hapit na maputol.
“Panit na lang ang naghawid sa liog sa biktima, nagkawilkawil, unya giguroy siya gidala sa kabugangan,” dugang ni Baclay.
Makita ang pat-akpat-ak sa dugo sulod sa 30 metro sa pagguroy sa biktima ngadto sa bakilid nga dapit sa kabugangan aron tagoan ang lawas.
Apan, sumala sa kapulisan, makita gihapon ang lawas ni Gedaro sa mga tawo nga moagi sa dalan sa ibabaw sa pangpang.
Dugang imbestigasyon sa kapulisan, ang biktima moadto unta sa iyang tindahan sa merkado sa sentro sa lungsod.
Sumala sa kabanay, nagdala si Gedaro og shoulder bag nga gisudlan sa wa pa matino nga kantidad sa salapi.
Apan ang shoulder bag wala na makita hinungdan sa pagtuo sa kapulisan nga gitulis ang biktima sa wala pa gipatay.
Dugang sa kapulisan nga buntag pa gipatay ang biktima human nauga na ang dugo sa yuta.
Ang crime scene dili kaayo layo sa panimalay sa biktima.
Nagduda usab ang kapulisan nga gipanid-an na ang lihok sa ni Gedaro ug posibleng kaila niini ang tulisan hinungdan nga gipatay.
Ang kapulisan sa San Fernando mohimo og dugang imbestigasiyon sa krimen.