Nagkanayon si national coach Chot Reyes nga naka-move on na ang Gilas Pilipinas sa kapakyasan niini pagsakmit og gold medal sa bag-uhay lang nahuman nga 31st Southeast Asian Games sa Hanoi, Vietnam.

“I personally felt hugely, hugely disappointed. I know that I have let a lot of people down,” matod pa ni Reyes nga napatik sa www.abs-cbnnews.com.

“I immediately took responsibility and accountability for the defeat... I really wish that the result were different.”

Gipasabot ni Reyes nga kinahanglan na nilang ipadaplin ang maong kapakyasan gumikan kay daghan pa silang mga misyon nga sagubangon.

Matod ni Reyes nga nagplano siyang mokuha og collegiate stars sa UAAP ug NCAA alang sa kampanya sa Gilas sa umaabot nga FIBA World Cup Asian qualifiers ug FIBA Asia Cup 2022 karong Hulyo.

Ning higayuna, magsugod na ang bag-ong season sa Philippine Basketball Association (PBA) hinungdan nga nakahuna-huna si Reyes nga mogamit og collegiate stars.

“This coming window, the PBA is ongoing, so now, fortunately the UAAP and NCAA is done so we are going to send UAAP and NCAA players, mostly, to that,” pasabot ni Reyes.

Asoy ni Reyes nga mas maayo sab kini aron mabaid og sayo ang collegiate stars sa international basketball.