Ang live-in partner sa namatay nga inahan uban sa iyang gisabak nga bata nangayo og hustisya ug nanawagan sa pagtangtang sa lisensiya sa doktor.
Si Joevinel Magno, 34, taga Barangay Canlumampao, dakbayan sa Toledo niawhag sa National Bureau of Investigation (NBI) 7 nga mohimo og independente nga imbestigasiyon sa kamatayon ni Immaline Villarino, 34, sulod sa Toledo City General Hospital, diin kini na-admit niadtong Mayo 11 sa hapon.
Sa pamahayag sa tagdumala sa ospital nga napatik sa SunStar Cebu kagahapon, Mayo 26, nipasalig kini sa paghimo og imbestigasyon bahin sa kamatayon sa inahan tungod sa alegasiyon nga medical negligence.
Matod ni Magno, wala siyay salig sa management sa tambalanan paglusad og imbestigasyon.
“Magpatabang mi sa NBI kay kon sila ra, lisod gyud kaayo na kon sila sila ra kay kon magkasinabot sila wa gyud tay mahimo mas maayo nang naay lain kay kahibawo sab sila unsay sipyat nila,” padayag ni Magno.
Iyang giasoy nga kapin duha ka adlaw nalandig sa maong ospital si Immaline kinsa high blood ug niadto sila sa tambalanan para magpa-intermittent auscultation (IA) sanglit sa Mayo 15 ilang gipaabot nga manganak og batang lalaki.
Matod ni Magno nga sulod sa duha ka adlaw, “okay” ra ang tubag sa mga nag-atiman sa iyang live-in apan nakurat na lang siya dihang giingnan siya nga kinahanglan i-refer ang iyang pares sa Vicente Sotto Memorial Medical Center (VSMMC) niadtong Mayo 14 diin igo silang nakaabot sa ospital.
Atol sa pagbalhin gikan sa Toledo paingon sa VSMMC, nihangyo pa siya sa midwife nga adto na lang sa South General Hospital sa Naga i-admit si Immaline kay nagping-it na sa kasakit ug ni-yellow na ang panit apan gibalibaran siya sanglit sa VSMMC sila naka-refer.
Giingnan pa siya nga dako og bayranan sa private hospital ug kinahanglan og P100,000 nga downpayment, dugang ni Magno.
Iyang giasoy nga kon didto pa nadala sa South General Hospital, posible buhi pa ang iyang pares.
Si Acting City Administrator ug City Social Welfare Development Officer nga si Mae Delia Tacandong sa Toledo City Government nagkanayon nga motabang ang City Hall ngadto sa pamilya labi na ang bayranan atol sa pagpalubong nga nahitabo niadtong Mayo 21, 2022.
Ang Toledo City Government adunay burial assistance program, libreng hatod sa porlon ug libre ang pantiyon sa mga kabus nga nagpuyo sa ilang siyudad.
Si Magno kinsa giubanan sa iyang duha ka anak lalaki nga si Wedzner, 12, ug Vanz Razil, 9, nitug-an sa Sunstar Cebu nga nagkasabot na unta sila sa iyang live-in nga si Immaline nga magpakasal sa simbahan human unta sa pagpanganak niini.
Sila si Joevinel ug Immaline nagkauban dihang pareho pang 19 anyos ang ilang mga edad.
Ang Superbalita Cebu nibisita sa Toledo City General Hospital kagahapon, Mayo 26, apan wala didto ang hepe nga doktor aron pagkuha og dugang habig sa ospital ug kalamboan sa ilang gisaysay nga imbestigasyon.