Naandan na nining summer time mangita ta og suroyan nga makapabugnaw niining init nga panahon apan dili makabuslot sa bulsa.
Di ikalimod nga daghang dapit nga haom sa inyong pagpabugnaw apan de kantidad nga maoy makapugong niadtong mga nagdaginot .
Diay haom sa inyong panginahanglan nga makalingawlingaw ilabi na niadtong nag-budget: ‘Tambayan ni Papa Luis’ kun TPL Resort.
Nahimutang ang maong facility sa Sityo Bangkerohan, Barangay Tayud, Lungsod sa Consolacion, Sugbo.
PAPA LUIS
Ang tag-iya nga si Edmon Melendres misaysay nga sa wa pa matukod ang maong facility nga kanhi swamp area, ang maong dapit maoy kanhi istambayan sa iyang nitaliwan na nga amahan nga si Luis.
“Diha mi mamasol sa una. Ang ibabaw (elevated land area) ana anha mi mag-uma,” saysay ni Melendres.
Ang maong property sinunod sa iyang kabanay nga gikan pa sa ilang apohan.
Naaghat ang maong tag-iya nga motukod og swimming pool for family use lang unta tungod kay sa higayon nga sila tibuok pamilya gusto nga mangaligo og dagat o pool kaniadto, mobiyahe pa paingon sa Lungsod sa Compostela o Dakbayan sa Danao.
Sa dihang natukod na ang 5 feet deep pool kadtong mga nahibawo mohangyo nga mangaligo hinungdan nga gibuksan kini ngadto sa publiko.
UNSAY NAA?
Haom ang TPL sa pagsaulog sa nagkadaiyang okasiyon kay adunay silay function hall nga maka-accommodate og 50 ngadto sa 100 ka tawo.
Adunay duha ka pool haom sa mga hamtong ug mga bata, open cottages, room accommodation nga good for two, stage area, basketball court adunay usa ka ring board, billiard hall, volleyball court ug stage area.
Daghang nang mga selebrasiyon nga gipahigayon sa TPL Resort diin ang labing bag-o mao ang wedding proposal sa ilang guest, wedding reception, birthdays, anniversary, bunyag ug simple family gathering.
RATES/OPERATION
Entrance fee: P80 – adult, P60 – 9 years old below, function hall with sounds and light – P5,000, open cottages nga kasudlan og 12 ka ka tawo - P600, rooms good for two (overnight stay) P2,000, tables and chair (4 person) P250, garden set (6 person) P350.
Di ra mo-charge ang management og corkage fee sa pagkaon ug imnunon nga dad-on sa area.
Ang TPL resort bukas gikan sa Lunes ngadto na sa Domingo.
Sa kadtong day-use magsugod gikan sa alas 8:00 sa buntag ngadto na sa alas 5:00 sa hapon, samtang sa kadtong mo-avail sa night use gikan sa alas 6 sa gabii ngadto na sa alas 10:00 sa gabii.
Alang sa inyong reservation ug dugang pangutana, mamahimong mo-message sa TPL Resort official Facebook page.
Arat na sa TPL Resort!