Gipatawag sa Cebu Bus Rapid Transit (CBRT) team inabagan sa Land Transportation Franchising and Regulatory Board (LTFRB-7) ang nagkadaiyang mga transport cooperative nga maoy maapektuhan sa implementasiyon sa BRT.
Lakip sa unang napaubos sa coordination meeting mao ang Kalunasan Transport Cooperative (KODTRASCO), El Pardo Transport Cooperative, Lahug Apas Transport Cooperative (LATRANSCO) aron sila maandam ug matabangan sanglit ang ilang mga rota ang maigo sa BRT.
Si Regional Director Eduardo Montealto Jr. sa LTFRB 7 nagkanayon nga usa sa mga katuyoan sa ilang pagpatawag mao nga ma-modernized ang ilang mga unit ug sa ayuda nga ilang madawat gikan sa Department of Transportation (DOTr).
Gipasabot ni Montealto nga aduna say posibilidad nga mabalhin ang ilang rota ug malikayan ang rota sa BRT aron aduna gihapon silay mapasakay nga mga pasahero.
Ang director sa LTFRB 7 nagkanayon nga ang mga kooperatiba nga maapektohan maoy hatagan og prayoridad sa ilang buhatan inabagan sa Cebu City Government, kinsa maoy moaprobar sa Local Public Transport Rout Plan (LPTRP) aron mabalhin ang ilang rota sa mas daghan og pasahero.
Si Montealto nipahibawo usab nga sila adunay mga rota nga maputol ug mahimo na lang nga feeder ang ubang PUJ diin sila na usab ang mohakot gikan ug paingon sa bus station.
“To modernize their units, kinsa tong mo-continue at least ma-advise-an na sila. Sila may priority nato asa sila ibalhin. Naa poy ubang maputol mahimo silang feeders aning BRT line,” padayag ni Montealto.