GIPANGITA na sa mga tinugyanan sa balaod ang suspek nga miluba-patay sa usa ka 44-anyos nga lalaki atubangan mismo sa iyang gikatagay nga mga higala sa Purok Malinawon, Barangay Dacudao, San Isidro, Davao del Norte alas 4:30 sa buntag, Huwebes, Mayo 26, 2022.
Ang biktima giila nga si Pedro Sabate Epolla, minyo ug molupyo sa nahisgutang lugar.
Base sa inisyal nga imbestigasyon, nasayran nga ang biktima nakigtagay og inom uban sa iyang mga higala, apan usa ka wala mailhing lalaki ang miabot ug way daghang istorya, giluba ang biktima gamit ang kutsilyo nga naigo sa likod nga bahin sa lawas.
Human sa gihimong krimen, ang suspek nagdaling mikagiw paingon sa wala masayring direksiyon samtang ang biktima gidali pagdala sa iyang mga kainom ngadto sa Davao Regional Medical Center Infimary Ward Extension sa San Isidro apan gideklarang dead on arrival sa mihiling nga doktor.
Gisubay sab karon sa kapulisan sa San Isidro Municipal Police Station ang motibo sa pagpatay sa biktima.