GRUPO sa teroristang Dawlah Islamiyah Turaife Group ang gitudlo sa pagpamomba sa mga siyudad sa Koronadal ug Tacurong udto niadtong Huwebes, Mayo 26, 2022.
Kini mismo ang gikompirma ni 6th Infantry (Kampilan) Division acting chief ug Joint Task Force Central Officer-in-charge Commander Brigadier General Eduardo Gubat.
Giingong diversionary tactics ang tumong sa grupo gumikan sa padayon nga paglutos kanila militar sa Maguindanao Province.
Kahinumdoman nga unang mibusikad ang improvise explosive device (IED) sa likod nga bahin sa yunit sa Yellow Bus Line nga nagdagan sa Koronadal City diin tulo ka mga tawo ang naangol.
Gisundan kini sa pagbusikad sa laing IED sa exit road sa Barangay Calean, Tacurong City apan way nadamay nga mga sibilyan.
Ang maong pagpamomba gikondena ni Gubat nga hinimoan sa nag-alyansa nga nga grupo sa Dawlah Islamiyah ug Bangsamoro Islamic Freedom Fighters .