Duna nay bag-ong natudlo nga provincial director sa Sugbo sa Department of the Interior and Local Government (DILG), si Atty. Kenneth Ian Lucero.
Si Lucero,kinsa nibisita sa buhatan ni Gobernador Gwendolyn Garcia, nipadayag sa iyang pakig-alayon sa tanang nasakopan niini alang sa kahapsay sa pagdumala sa mga lokal nga kagamhanan.
Gihulipan niini ang iyang asawa nga si kanhi DILG provincial director Jhoaden Lucero human kini na promote isip bag-ong assistant director sa DILG sa Region V sa Bicol.
Si Atty. Lucero dili na hinuon bag-o sa pag serbisiyo sa DILG sanglit nahimo na siyang direktor sa DILG sa dakbayan sa Sugbo.
“Isip bag-ong provincial director sa probinsya sa Sugbo i-assure the honorable governor Gwen Garcia and the Cebu provincial government nga naa mi diri ang DILG Cebu Province nga mo serve as development partner for all the local government units of Cebu province, the component cities and barangays,” matod ni Atty. Lucero.
Ang DILG maoy nag unang buhatan sa gobiyerno nga maoy responsable sa pagpatunhay sa kahapsay ug kalinaw, kaluwas sa publiko ug ang pagbansay sa kapasidad sa local government units aron mas makahatag og epektibong serbisyo ngadto sa sa katawhan.
Gawas sa mga LGU, nalakip sa mga buhatan nga gipaubos sa DILG ang kapulisan, kabomberohan ug ang prisohan sa probinsiya hiungdan sa iyang kritikal nga tahas sa pagdumala sa lokal nga kagamhanan sa lalawigan.