Gisubli sa pagpahinumdom sa Commission on Elections (Comelec) sa probinsya sa Sugbo ang mga nikandida,to nakadaog man o wala, sa pagsumiter na sa ilang Statement of Contribution and Expenditures (Soce) sa dili pa ang Hunyo 8 nga maoy deadline niini.
Subay sa uwahing listahan sa buhatan duha pa lang ang nakasumiter sa ilang Soce. Sila si Vice Governor-elect Hilario Davide III ug Bokal Jose Mari Salvador.
Ubos sa Section 14 sa Republic Act 7166, gitahasan ang tanang mga kandidato ug ang treasurer sa usa ka political party nga moduso sa tibuok, tinuod, ug itemized nga statements sa tanan nga mga kontribusiyon nga nadawat sama sa mga donation, loan o advance ug ang nagasto sulod sa adlaw sa pagsugod ug hangtod nahuman ang campaign period sa nasudnonug lokal nga eleksiyon sa Mayo 9, 2022.
Kutob lang sa Hunyo 8 modawat ang Comelec Province alang sa mga Soce sa mga nikandidato ug dili na kini mo-extend pa.
Ang mga dokumento niini ipadala na sa Comelec sa kaulohan.
Hinuon, mahimong makaduso sa ilang Soce ang mga mauwahi apan didto na kini nila iduso sa central office sa Comelec ug dunay multa.
Dili usab pwede molingkod sa katungdanan sa Hunyo 30 ang kandidato nga wala pa makaduso sa iyang SOCE sa Comelec.
Sa Pebrero 8, 2022 nagsugod ang pagpangampanya sa mga kandidato sa nasudnong posisyon, samtang sa Marso 25, 2022 usab nagsugod ang pagpangampanya sa lokal nga posisyon