Patay nang napalgan ang usa ka 65 anyos nga lola sa Purok 1, Barangay Pag-ahat, lungsod sa Candijay, Probinsiya sa Bohol.
Si Police Chief Master Sergeant Leonard Tefondo sa Candijay Police Station niila sa namatay nga si Mila Galorpo, 65, ug molupyo sa maong lugar.
Matud ni Tefondo nga nadawat nila ang maong taho sa alas 8:00 na sa gabii apan nadiskrobehan ang patay nga lawas ni Galorpo sa alas 6:30 sa sayong kagabhion sa Huwebes, Mayo 26, 2022.
Dugang ni Tefondo nga si Pag-ahat Barangay Captain Marites Conday maoy nipahibalo kanila kalabot na sa maong hitabo.
Sa imbestigasiyon sa Candijay Police nga nianang alas 5:30 sa hapon dihang ang bana ni Galorpo nangita niini tungod kay wala pa nakauli gikan nanugway og baka.
Sa iyang pagpangita niini, nakit-an sa bana ang lawas sa iyang asawa mga 70 metros gikan sa ilang panimay nga nagbuy-od na ug wala nay kinabuhi.
Tupad niini ang mga kahoy nga dala niini nga pangsugnod nga dalhon unta sa iyang pag-uli nga gamiton sa pagluto unta sa ilang panihapon.
Dugang ni Tefondo nga sa iyang paghiling sa patay nga lawas sa biktima sa pagdala niini sa tambalanan, nasuta nga giataki kini sa kasingkasing nga maoy hinungdan sa kamatayon.
Giingong anaa sa kapin 2 kilometros ang gilay-on ang tugwayanan sa ilang baka gikan sa ilang panimalay paingon sa bukirang bahin sa Barangay Pag-ahat. Ang kapulisan nagkanayon nga walay foul play sa kamatayon sa 65 anyos nga lola.